Казанга сәяхәт – бәйрәм бүләге
Бөек Җиңүнең 70 еллык юбилее алдыннан районыбыз, республикабыз, илебез күтәренке рухта яши. Бик күп бәйрәм чаралары уза.
7 май көнне Казанда, Бөек Ватан сугышы ветераннары һәм тыл хезмәтчәннәре М.Җәлил исемендәге татар дәүләт опера һәм балет театрында Татарстан лидеры Рөстәм Миңнеханов белән очрашачак. Республикабыз шәһәр-районнарыннан килүче ветераннар делегацияләре арасында минзәләлеләр дә бар. Алар бу әһәмиятле вакыйганы үзләре өчен зур дәрәҗә дип кабул иттеләр.
Сугыш һәм тыл ветераннары Тәгъдимә Ахунова, Анна Лебедева, Нәҗип Галимәрданов, Петр Зотов әлеге тантанада катнашачак.
Тәгъдимә Ахунова районыбызның Урыс авылында туа. Алты балалы гаиләдә үсә ул. 12 яшьлек кызчык дүртенче сыйныфны тәмамлаганнан соң өлкәннәр белән бергә колхоз эшенә җигелә. Сугыштан соң Бөгелмәдә йөкче булып эшли. Биш бала тәрбияләп үстергән.
Анна Лебедева – гаиләдәге сигез баланың берсе. Ул да 12 яшеннән басуда эшли башлаган, Иске Маҗын авыл советына почта ташыган. Сугыштан соң төрле эшләрдә эшләгән.
Алты бала анасы. Татар Мөшегесе авылында яшәүче Нәҗип Галимәрданов утны-суны кичкән. Сержант званиесендә япон сугышында катнашкан. Сугыштан соң Казан Республика авыл хуҗалыгы мәктәбен тәмамлаган, “Марс” колхозы рәисе булып эшләгән.
Петр Зотов Гришино авылында туган. Сугыш чорында басу-кырларда хезмәт куйган. МТСта механизатор булып эшләгән.