Нефть файда китерәме?

МУРБ бетсә дә, минзәләбез нефтьчеләр төбәге булудан туктамады. Нефтьчеләребезнең шактые Себер якларында эшләсәләр дә, район җирлегендәге нефтьне суыртуда да күбесенчә үзебезнекеләр хезмәт куя. Хәбәрчебез “Мензелинсксервис” ҖЧҖ дә булып, андагы алдынгы эшчеләр, нефтьчеләр турында кызыклы мәгълүматлар алып кайтты.

Эшләре уңышлы бара

Рәсемдә сез күргән егетләр – скважиналар ремонтлау бри­гадасыннан мастер Альберт Хәйбуллин, бораулаучы Вик­тор Судаков, машинист Фәнүс Мөхәмәтгалиев, бораулаучы ярдәмчесе Илдус Ибраһимов. Ремонтчыларның теләсә кай­сы өлкәдә дә эшләре җиңелдән түгел, гаять дәрәҗәдә катлаулы дияргә була. Монда инде каба­лану, ашыгу артык. Мәсьәләне коллектив белән киңәшләшеп, уртага салып кына хәл итәргә кирәк. Бу егетләр Түбән Кама сусаклагычына кергән “Тими­ровские” нефть ятмаларында­гы скважиналарны ремонтлау белән мәшгульләр. Альберт нефть өлкәсендә – 20, Вик­тор – 30, Фәнүс – 30, Илдус 5 ел хезмәт куя. “УРАЛ” автома­шинасына көйләнгән АПРС-40 маркалы агрегат 3 мең метрга чаклы булган скважиналарны ремонтларга сәләтле. Аларның төп заказчигы “РИТЭК”. Бу уңганнар монда килгәнче Чал­лы янындагы Луговое нефть ятмасындагы скважиналарны ремонтлаганнар, хәзер шушы утрауда эшләп яталар. Утрау­га аларны паром белән алып киләләр. Шушындый матур та­бигать почмагын үзләре мах­сус рәвештә сайлап алганнар диярсең. Җир-анабыз өчен күңелне берникадәр тыныч­сызлану хисе биләп алды. Ки­таптан укыганнар, кинолардан караганнар искә төште дә, бо­лар табигатьне, сусаклагычны пычратмаслармы соң, дигән уй баштан йөгереп үтте. Мастер Альберт Хәйбуллин мине бик тиз тынычландырды:

– Әнә, күрәсеңме, нефть агар, тамар дигән җиргә мах­сус пленкалар җәйдек, ремонт эшләре бетү белән без аларны җыеп алабыз, үтильләштерергә Әлмәткә җибәрәбез, гомумән, нефтьнең ялгыш кына өскә, ягъни без эшләгән җиргә чы­гуына юл куймыйбыз, – диде ул. Скважинаны ремонтлагач, монда чип-чиста булып кала. Алар скважиналарны төрлечә ремонтлыйлар, ягъни ватылу дәрәҗәсенә карап: бер атна­да да ремонтларга мөмкиннәр, кайчагында өч айга да сузыла икән.

Альберт Хәйбуллин җитәк- ләгән бригада әгъзалары скважина җимерелсә, насос эшләмәсә, скважинада авария булса, пластлар нефтьне аз бирсә, ремонтлыйлар, скважи­наны яңадан сафка бастыра­лар. Ремонтлаганда насосны алып торалар, аннары, ремонт­лап бетергәч, кире урынына куялар. “Мензелинсксервис”та нефтьчеләр өчен яшәү, тук- лану, ял итү өчен бөтен мөмкинлекләр тудырылган.

Булдыклы капитан

“Мензелинсксервис” ҖЧҖ дә утрауларга алып бару өчен ике махсус катер бар. Аның берсе – “Родина” исемле, катер белән Александр Петухов идарә итә. Мәктәпне тәмамлаганнан соң, Пермь елга техникумында 4 ел укый, шул ук вакытта шо­фер һөнәрен дә үзләштерә. Минзәләнең икмәк кабул итү пунктында “ЗИЛ” автомашина­сында, “Недра” ҖЧҖдә “Кам- АЗ” автомашинасында шофер булып эшли, төрле йөкләр, ягулык-майлау материаллары ташый. Менә хәзер 4 ел инде Дәвек причалыннан утрауга чаклы катерга тагылган па­ром белән навигация чорын­да нефтьчеләрне эш урынына йөртә. Бу катер сусаклагычта боз каткач кына туктый икән. Боз каткач, нефтьчеләрне де­ журга “Хивус” һава мендәре белән утрауга йөртәләр. Ул йөрткән паромга 150 тоннага якын йөк төяргә була. Алек­сандр 1973 елда чыккан катер­ны карап, җайлап кына йөртә, вакытында техник хезмәт күрсәтә, шулай булмаса, ул йөрткән катер 42 нче елын эшләмәс иде.

Александр эштә генә түгел, гаиләдә дә үрнәк әти. Тор­мыш иптәше Ирина Михайлов­на белән бер кыз һәм бер ул тәрбияләп үстергәннәр. Улы Михаил “Евразия” бораулау компаниясендә хезмәт куя, ә кызы Юлия Казан КНИТУның Түбән Кама филиалында укый.

безнең өстәмә:

Минзәләдә нефть чыга­ру белән беррәттән, яңа ятмаларны эзләү дә дәвам итә. М-7 трассасыннан йөрүчеләр игътибар иткәне булгандыр: Уфага барган юлда – Минзәлә күпере янында, аннары сул якта – урман аланында, раз­ведка-бораулау эшләре алып барылды. Ышанырга мөмкин булган мәгълүмат чыганагы хәбәр иткәнчә, алар нефть таба алмаган. Шуңа нефтьчеләребезнең ачылган чыганакларның кадерен белеп һәм район икътисадына файда ките­рерлек эшләүләрен телисе генә кала.

Дилфас ГАЛИЕВ