Мәһабәт йортлар ямь өсти

Яңа Мәлкән авыл җирлегенә кергән авылларның төзекләнә баруы, яңа объектлардан тыш яңа йортлар төзелүе соклану уята, заманча материаллардан салынган мондый мәһабәт йортлар авылларга ямь өсти.

Яңа Мәлкән авыл җирлеге баш­лыгы Зөфәр Нәҗметдинов бу вазифаны өч ел элек башка­рырга алынган. Моңа кадәр ул урта мәктәптә укыта иде. Кем әйтмешли, аягы “җиңел” булды.

Шушы вазыйфага керешкән елында ук, авыл җирлегенең от­чет җыелышында Мәлкән авы­лына тагын бер өстәмә су сква­жинасы кирәклеген искәрткән иде авыл кешеләре. Язга чык­кач, шушы четерекле эшкә ке­решеп, җәйгә яңа скважинадан яңа салынган су трассасын­нан файдалана да башлый яңамәлкәнлеләр. Дусайкичү авылында яшәүчеләр дә суүткәргечләренең якын арада яңартылуына өмет итәләр.

– Соңгы 4-5 елда гына да җирлектә 15 йорт салынды. Йорт салучылар арасында авыл хуҗалыгында эшләүчеләр дә бар. Әйтик, Айрат Шакиров үз көче белән салып, узган ел яңа йортка керде. Ул ындыр табагын­да орлык чистарту агрегатында эшли. Гомер буена хуҗалыкта машина йөртүче булып эшләгән Борис Сизовның улы Валерий да бүгенге көндә үз көче белән йорт төзи. Аның хатыны Ләйсән балалар бакчасында эшли, ике бала үстерәләр. Читкә чы­гып киткән авылдашларыбыз да авылга кайтып йорт сала башладылар. Әйтик, Альберт Назаров Иске Мәлкәндә йорт салырга кереште. Шушы якның табигатен үз итеп Зәй, Әлмәт ише шәһәрләрдән килеп йорт салучылар да байтак. Алар нигездә йортларын дача итеп файдаланалар, биредә ял итеп китәләр, – дип авыл тормы­шы белән таныштырды Зөфәр Нәҗметдинов.

Әйе, авыл җирлеге башлы­гы читтән килеп йорт салучы­лар хакында хәбәрдар булып тора, аларга таянып авылны төзекләндерү хәстәрен күрергә тырыша. Яңа Мәлкән авылын­да моннан берничә еллар элек шундый йортлар калкып чыккач та, авыл урамнары шул йорт­ларда яшәүчеләр көче белән күтәртелеп, ком-таш җәелгән иде. Узган ел Иске Мәлкән авы­лындагы бер урамга керә тор­ган юлга да Әлмәттән килгән эшмәкәр Рифкат Садыйков көче белән вак таш җәелгән. Авыл урамнары тулысынча күтәртелеп, вак таш салынса, авыл тагын да төзекләнер иде. Авыл зурая төшкәч, электр энергиясенә дә ихтыяҗ зу­рая. Шуны истә тотып, биредә яңа трансформатор урнаш­тырылган, электр баганалары яңартылган.

– Безнең якның табигате матур, җире уңдырышлы. Авылларга газ, телефон кергән, Интер­нет үткәрелгән, пенсия, район газетасы вакытында таратып торыла. Яшим дигән кешегә бөтен шартлар бар. Юллар да асфальтланса, бигрәк яхшы бу­лыр, барыбыз да сөенер идек, – ди авыл җирлеге сәркатибе Резидә Шиһапова.

сан

Яңа Мәлкән авыл җирлегенә кергән Яңа Мәлкән, Иске Мәлкән, Дусайкичү авылларында 307 йортта 582 кеше яши, шуларның 218е – пенси­онер, мәктәптә укучылар 25, мәктәпкәчә яшьтәге  19 бала бар.

Флүрә МУСИНА