Иң яхшы шәфкать туташы
Шундый девиз астында район үзәк хастаханәсендә һөнәри бәйрәмгә багышланган конкурс үтте.
Катнашучыларга кыска гына вакыт эчендә үзеңнең визит карточкаңны тәкъдим итәргә теоретик белемеңне күрсәтергә һәм авыруның урын-җирендә практик биремнәрне үтәргә, блиц сорауларга җавап бирергә, “өй эшен” күрсәтергә һәм якларга, иң ахырда чараның “Иң яхшы шәфкать туташы” дигән төп теманы ачарга кирәк иде. Җанатарлар плакатлар, шарлар белән бизәлгән актлар залын тутырдылар. Сәхнәгә хастаханәнең бөтен бүлекләреннән яшь, матур 7 катнашучы чыкты. Жюри бәяләве буенча алар бөтен биремнәрне дә яхшы үтәделәр, конкурсантларга җанатарлар да көч биреп тордылар.
Ләкин шулай да неврология бүлегеннән шәфкать туташы Наталья Коростина (1 нче урын), реанимация бүлегеннән шәфкать туташы Гөлназ Сөләйманова (2 нче урын), кабул итү бүлегеннән шәфкать туташы Наталья Чигвинцева (3 нче урын) иң яхшылары дип табылды. Тамашачыларның көчле алкышлары, жюри әгъзаларының һәм конкурсны алып баручы өлкән шәфкать туташы С.Гобәйдуллинаның рәхмәт сүзләре бөтен катнашучыларга да җитте.