Яңа урында, яңача

“Кадрәк” ял һәм күңел ачу үзәгендә авыл халкына һәм килгән кунакларга ял итү өчен мөмкинлекләр ту­дырырга тырышканнар, ба­лык каптырасың килсә кар­мак белән балык эләктерү өчен биш гектарлы күле бар, тирә-ягына меңләгән агачлар утыртылган. Электр линиясе сузылган. Эскәмияләрне ике рәтле итеп күтәртеп ясаганнар, тактаны ефәк ситсы белән төреп тә куйганнар.

Сабантуйны алып баручы Чаллы шәһәренең мак­таулы гражданы, ТРның атказанган мәдәният хезмәткәре Гөлзада ханым Рзаева ачып җибәрде. Сабантуй мәйданына күл төбеннән чыгып су патша­сы Нептун һәм аның кызы, Су анасы килеп керде. Ул әйткәнчә, күлләр, елгалар һәм океаннардагы сулар икмәк кебек иң кирәклесе. Безнең сезгә теләгебез шул: күлләрне, елгаларны чистартып торыгыз, – диде Нептун. Юрий Гарнышев шушы күлне чистартып, ял итәр өчен урын ясады. Нептун табигатьнең ал­тын ачкычын аңа тапшыр­ды. Ул ял итү паркында яшелләндерү эшләрен дәвам итәчәген, авыл халкының, хуҗалык, авыл җирлеге башлыгының булышуларын тагы бер кат дәлилләде. Анна­ры “Мензелинские зори” агрофирмасының «Кали­нин» хуҗалыгы җитәкчесе Рамил Биктимеров килгән халыкны Сабан­туй бәйрәме белән чын күңелдән тәбрикләде. Аннан соң игенчелектә, терлекчелектә тырыш һәм яхшы хезмәт нәтиҗәләре күрсәткән авылдашлары чакырылып, һәркайсына бүләкләр тапшырылды. Кыр батыры булып Юрий Юзманов танылды. Аңа махсус приз – 60 килолы бозау алу өчен документ бирделәр. Барысы 200дән артык кешегә бүләк тап­шырылды. Бүләкләр сал­лы, бер кешедә онытыл­маган, хуҗалыкта эшләгән кешенең кадерен беләләр бит. Аннары сабантуй әләмен Кадрәкнең был­тыргы абсолют чемпио­ны Ришат Гайнетдинов, быелгы язгыкыр эшләре батыры Юрий Юзманов һәм сыер савуда алдынгы терлекче Нина Кириллова күтәрде.

Сабантуйга Туфан Миң- нуллин исемендәге Түбән Кама татар дәүләт те­атры артистлары да килгән иде, алар “Гөргери кияүләре” спектакленнән бер күренеш, күрсәттеләр. Аннары алып баручылар Кадрәк сабантуена кайт­кан күренекле якташла­рын, югары хезмәтләре белән дан казанганавыл­дашларын мәйдан урта­сына чакырып таныштыр­дылар һәм бүләкләделәр. Барлыгы 12 кешегә само­вар бүләк иттеләр. Шулай ук Кадрәк җирлеге бик күп спорт мастерлары, данлыклы көрәшчеләр тәрбияләгән, үстергән төбәк ул, аларга да кыйммәтле бүләкләр тап­шырылды. Көрәшчеләр дигәннән бу сабантуйга республиканың данлы­клы көрәшчесе бик күп сабантуйлар батыры Раббани Гайфуллин да килгән иде, бу легендар көрәшче белән бергә бик күп көрәшчеләр фотога да төштеләр.

Сабантуйга якташла­ры ТРның атказанган артисты данлыклы, шөһрәтле җырчы Резедә Шәрәфиева, Равил Гали­ев, Чаллы шәһәреннән “Карендәшләр” ансам­бле, композитор Ринат Гобәйдуллин, язучы сати­рик, публицист Фәнзаман Баттал да килгән иде. Алар үз чиратында халыкны моңлы, күңелле җырлары белән сөендерделәр. Энҗе Мингалимованың Кадрәк турында яңа җыр башкаруы нур өстенә нур булды.

Уйналган уеннар, ярышларның бөтенесенә дә тукталып тормыйча, гадәт буенча сабантуйда иң ерактан кайткан кеше, иң озын толымлы хатын- кыз, иң карт кеше, яңа туган бала, яңа өйләнешкән пар, быел өй салып кергән гаилә һәм башкасы билгеләп үтелде.Аларның күбесендә кадрәклеләр катнашып, иң оста, җитезләргә дигән бүләкләр дә шуларга эләкте. Касыйм Гафиятов исемендәге татарча көрәш турнирын генә алыйк. Анда төрле үлчәүдәге авырлы­кларда Ришат Гайнетди­нов, Илнур һәм Илнар Ка­маловлар, Ирек Заһриев, Ришат Камалов,Алмаз Нәбиуллин һәм башкалар беренче ике урынны алды­лар. Ә Сабантуйның абсо­лют батыры булып икенче ел рәттән Ришат Гайнет­динов калды. Яшьләр ара­сында шулай ук Кадрәк җирлегеннән Алмаз Нәбиуллинга тиңнәр бул­мады. Кунаклар арасында ТРның һәм Россиянең атка­занган спорт мастеры, Уни­версиада чемпионы Ринат Әхмәтшин җиңүче булды.

Ул ярышларда 11 ат катнашты, алар­ны иярләүчеләргә дә истәлекле бүләкләр тап­шырылды. Аюдан Раил Газизовның аты беренче, Җәмәктән Илназ Ханна­нов иярләгән ат икенче, Тукай районыннан Илмир Нигъмәтуллин иярләгән ат өченче булып килде. Ат чабышында ат иярләгән ике кыз да бар иде. Җәмәк авылыннан чабышкы ат­лар тәрбияләгән Нурга­ли Гыйлаҗевка да махсус приз бирделәр. Багана башына менүчеләр, кап­чык киеп йөгерүчеләр, 46 размерлы галош киеп йөгерүчеләрнең исәбе- хисабы юк иде. Юрий Гар­нышев үзе бер уен уйлап тапкан – кем тизрәк һәм күбрәк йомырканы кулы белән кысып вата, әлеге уенны да халык бик яра­тып кабул итте. Бер якта җырчылар җырлап тор­ды, Сабантуй мәйданы тирәли сәүдә гөрләп барды. Эшмәкәрләр бу бәйрәмдә акчаны көрәп алдылар. Кадрәк са­бан туе бәйрәме көнне вертолетта үтеп киткән Президентыбыз Рөстәм Миңнеханов, Казаннан, Пермьнән һәм башка бик күп шәһәрләрдән килгән кунаклар да, якташлар да бик ошатып киткән.