Яшел урак башланды

 1 июнь көнне “Сөт иле Чулман” филиалы механизаторы Әскать Әхмәтов (рәсемдә) Байлар хуҗалыгында Полесье-280 азык хәзерләү комбайны белән 56 гектарлы люцерна басуын чабып бетерде.

 Хәзер 100 гектарлы костер үләнен чабарга кереште.

 Аның артыннан Рифкат Рәхимов МТЗ-82,6 тракто­рына ГВК-6 тагып чабылган печәннәрне әйләндерә. Печән җилләү, ягъни кибү белән МТЗ-82 трак­торында Илдар Вәлиев һәм МТЗ-1221 тракторын­да Фәнис Бәдертдинов пресс-җыйгыч тагып печәннәрне төргәкләргә төрәләр. Бу ике тракторчы 56 гектарлы люцерна ба­суындагы печәнне җыеп та бетерделәр.Хуҗалыкта барлыгы күпьеллык үләннәр 317 гектарны били, шуның 48 гектарлы люцер­на басуы орлыкка алу өчен калдырылган. Монда уз­ган елда да шул басудан барлыгы 7 тонна люцерна орлыгы алынган булган, аны быел филиалның ку­пьеллык басуларын яңарту өчен тотканнар.

Көннәр коры торган­да басулардагы ча­былган печәннәрне тиз арада җыеп алып фер­ма янына алып кай­тып урнаштырабыз,-ди хуҗалык җитәкчесе Рөстәм Исламов.

Район башлыгы хуҗалык җитәкчеләре алдында бу ел өчен бик киеренке бу­рыч куйды. Яңа туган боза­уларны да кертеп һәм мал­га бер тонна исәбеннән печән әзерләргә кирәк. Нигә киеренке? Чөнки хуҗалыкларда 11 мең гектар күпьеллык үлән мәйданнарының күбесе (4.5 мең гектар) искерде инде. Гадәттә, алардан бер тапкыр гына үлән чабып алырга мөмкин булачак. Быелгы коры­лык нәтиҗәсендә ул мәйданнардан өстәмә ту­кландыру өчен булса да икенче тапкыр чабу өчен үлән үсмәскә мөмкин.

Былтыр чәчелгән 1165 гектар күпьеллык үлән бе­ренче уңышын бирәчәк. Быел тагын мең гектар төрле күпьеллык үләннәр мәйданы артачак.

Иң киеренке хәл “Сөт иле” – “Минзәлә”дә – өч мең гектарлап күпьеллык үлән чәчәсе бар.

Шуңа шәхси хуҗалыклар гына түгел, агрофирмалар да печәнне болынлыклар­дан чабу җаен табарга тиеш булалар. Минзәләдә табигый болынлыкларның мәйданы иксез-чик­сез. Мамадыштагы ке­бек авыл җирлекләре (шәхси хуҗалыклар белән бергәләп) һәм аг­рофирмалар көчләрен берләштерсәләр мөмкин кадәр күбрәк печән әзерләнер иде.

 Беренче графа – хуҗалыклар, икенче – 2014 елның 1 нче июненә хуҗалыклардагы мөгезле эре терлек саны.

“Сөт иле” ҖЧҖ филиалы ”Чулман” 4084

“Сөт иле” ҖЧҖ “Минзәлә” 3877

“Заиковский” ҖЧҖ 1258

“Калинина” ҖЧҖ 1220

“Николаевское” ҖЧҖ 1189

“Калморза”ҖЧҖ 637

КФХ 1346

Район буенча 13 933