Тырышларны данладылар

 Анда узган чордагы эшчәнлеккә йомгак ясалды, бурычлар билгеләнде, иң яхшы игенчеләргә, терлекчеләргә, оста оештыручыларга кыйм-мәтле бүләкләр тапшырылды. Райондашлар­ны әлеге бәйрәм белән тәбрикләргә ТР авыл хуҗалыгы һәм азык-төлек министры урынба­сары Илдус Габдрахманов, ТР Дәүләт Советы депутаты, Чаллы КХПсы генераль директоры Алмаз Шәрипов, Агросила групп җитәкчесе Ил­дар Гыймадиев, Казан сөт комбинаты директоры Разиф Кәримов һәм башка җитәкчеләр килгән иде.

Котлау сүзе белән район башлыгы Айдар Са­лахов чыгыш ясады. Чыгышында ул район фермаларында реконструкцияләр үткәрү, агро­промышленность комплексында үзгәрешләр булачагын, авыл хезмәтчәннәренең көнне-төнгә ялгап эшләүләрен, бергәләп кенә булган авыр­лыкларны җиңеп чыгып, дусларча эшләп алга барачакбыз, дип билгеләп үтте.

Тантаналы җыелышта район башлыгы Айдар Салахов уңышлы һәм нәтиҗәле эшләгәне өчен «Заиковский» ҖЧҖ җитәкчесе Радик Фәттахов-ка Россия Федерациясе авыл хуҗалыгы министрлыгының Мактау грамотасын, уңышлы эшләгән һәр җитәкчегә район башлыгының Рәхмәт хатын һәм бүләк итеп “Спартак” аяк кие­ме фабрикасында махсус эшләнгән күн итекләр тапшырды.

Игътибарымны шул җәлеп итте: җитәкчеләргә кышкы салкында фермада кияр өчен кирәк бу җылы итекләр. Димәк, җитәкчеләр шушы итек белән ферма тирәсендә көн саен булып, андагы хәлне белеп, технологиянең дөрес үтәлешен таләп итеп торачаклар. Аннары Илдус Габдрахманов әйткәнчә, быелгы ел игенчеләр алды­на зур сынаулар куйды, авыл хуҗалыгы үзенә бер төрле, анда эшләү җиңелләрдән түгел, заводта продукцияне алмаса­лар, ишегенә йозак салалар, ә малларның ашатырына булма­са, сыерның авызына йозак элеп куеп булмый. Шуңа да карама­стан, без оптимистлар булып калыйк, яхшыга өметләник дип ул Марат Әхмәтовның котлавын җиткерде. Мәртәбәле кунак буш кул белән килмәгән иде, ул «Ва­мин Минзәлә» агрофирмасы ди­ректоры урынбасары Сабирҗан Кәримовка РФ авыл хуҗалыгы министрлыгының Мактау грамо­тасы, хезмәт алдынгыларына авыл хуҗалыгы һәм азык-төлек министрлыгының Рәхмәт хатла­рын, кыйммәтле бүләкләр тап­шырды.

Уңганнарның иң-иңнәре сәхнәгә күтәрелгәч зал көчле алкыш­ларга күмелде. Аларга район хакимиятенең Рәхмәт хатла­ры, бүләкләре тапшырылды. Бу көнне минзәләлеләр шатлыгын уртаклашырга республиканың аграрийлар белән турыдан туры хезмәттәшлек итүче төрле оешмалар вәкилләре дә килгән иде. Аларның һәрберсе авыл эшчәннәренең уңганлыгына, хезмәт сөючәнлегенә ихти­рам белдерде. “Просто молоко” идарәче компания исеменнән Разиф Кәримов үзләре белән хезмәттәшлек иткән агрофирма җитәкчелегенә рәхмәт җиткереп, акчалата бүләкләр тапшыр­ды. Татпотребсоюз җитәкчесе, якташыбыз Мәхмүт Фәттахов берничә хуҗалыкка телевизор җибәргән.

Бәйрәм ахырында авыл хуҗалыгы алдынгылары чәй табыны артында хөрмәтләнде. Район үзешчәннәре әзерләгән концерт программасы исә күңелле ял иттерде. Тырыш­ларны данлауга эшмәкәр Равил Миңнехуҗин һәм Язкәр Биҗанов зур өлешләрен керттеләр