Участковыйларга йорт салынды
Төзелеш төп өч чыганактан финансланган. Комплекслы программа нигезендә бүлеп бирелә торган республика бюджеты чараларына 18 муниципаль берәмлектә 20 торак йорт төзелде. Безнең районда әлеге программа буенча административ-торак комплекс Хуҗәмәт авылында җиткерелде. Учас- ток уполномоченныена ачкыч тапшырырга дип бирегә район башлыгы Айдар Салахов, район эчке эшләр бүлеге начальнигы Илсур Хазиев һәм башка кунаклар җыелды. Бу җирлектә участковый Рифат Исмагилов эшли. Җиде ел элек ул ЭЭМнең Минзәлә районы буенча бүлегенә эшкә керә һәм бүгенге көнгә кадәр биредә намус белән хезмәт куя. Рифат Хуҗәмәт авылыннан башка Югары Тәкермән һәм Коноваловка җирлекләрендә тәртип саклый. Хәзерге вакытта тормыш иптәше белән ике малай тәрбияләп үстерәләр. Рифат Исмагилов үзе “Хәзер хөкүмәт безнең турыда уйлана башлады, менә яңа йорт салып бирделәр. Моңа кадәр
Минзәләдән килеп йөрергә мәҗбүр идем. Безнең гаилә өчен бу бик сөенечле вакыйга, без барыбыз да бик шат. Бүгенге көннән хокук бозулар кимер дип уйлыйм”, – дип әйтә. “Иптәшем өчен туган авылына кайту икеләтә шатлык. Безнең өчен бу бүләк көтелмәгән булып чыкты. Хөкүмәткә зур рәхмәтебезне белдерәбез”, – дип уртаклашты сөенече белән участковыйның тормыш иптәше Ландыш.
Муниципалитетлар хисабына республикада 38 берәмлектә 41 торак йорт төзү финансланды. Безнең районда бу чыганактан комплекс Иске Матвеевка авыл җирлегендә салынды. Шунысын билгеләп үтәргә кирәк, район депутаты Эдуард Кузнецов бу полиция участогын төзүдә башлангыч матди ярдәм күрсәтте. Һәм менә инде ике ай эчендә генә биредә полициянең участок пункты калкып чыкты. Йортның мәйданы 95 квадрат метр, кабинет мәйданы – 20. Пункт ачкычын участковый Сергей Антоновка тапшыру тантанасында ике объектны да сафка бастырган ПМК “Мелиорация” хезәмткәрләре Евгений Петров һәм Артур Семеновка район башлыгының рәхмәт хатлары тапшырылды. Сергей Николаевич Эчке Эшләр Министрлыгында 10 елдан артык хезмәт куя. Эшләгән вакыты дәверендә үзен тырыш, намуслы хезмәткәр буларак күрсәтте. Бүгенге көндә ул үрнәк булырлык гаилә башлыгы да, тормыш иптәше белән алар бер кыз бала тәрбияләп үстерәләр. Аның административ участогына Әтрәкле, Иркәнәш, Иске Матвеевка авыл җирлекләре керә. Анда якынча 3 500 кеше яши.
Сергей Антонов һәм Рифат Исмагиловка хезмәттә куллану өчен автомашиналар тапшырылды.