Тагын бер яңа йорт

Холодный Ключ авылын­да яшәүче өлкәнебез Га­лина Елхова да шушы бәхетле мизгелләрне кичерде. Өр-яңа шәхси йорт ачкычын тапшыру тантанасында муници­паль район башлыгы Ай­дар Салахов, РФ Дәүләт Думасы депутаты Виктор Пешков, ТР Дәүләт Сове­ты депутатлары Роберт Миңнуллин, Илдус Кама­лов һәм башка кунаклар катнашты.

1925 елгы Александр Ел­хов сигез ел дәвамында ил иминлеген саклап, сугышта була. Яу кы­рыннан исән-сау кай­тып, алар хәләле Галина белән 56 ел бергә тату гомер кичерәләр. Галина апа хәләл җефете Алек­сандр абый белән 4 бала тәрбияләп үстерәләр. Бөек Ватан сугышы ве­тераны Александр Ел­хов якты дөнья белән 7 ел элек хушлашкан. Шундый авыр михнәтле тормыш кичергән бу ха­ным хәзерге вакытта кече улы Павел белән авылда тора. Авыл йор­тында уңайлыклар юк, әбинең өенә хәтта су да кертелмәгән. Галина Ел­хова үзен начар хис итү сәбәпле, йорт ачкычы аның оныгы Людмилага тапшырылды. “Бу безнең өчен зур бәхет. Әбиебез өчен бар уңайлыклар да бар. Киң иркен бүлмәләр, ванна бүлмәсе үзе бер бүлмә сыман”, – дип ур­таклашты безнең белән сөенечен Людмила.

Шундый йортны җиткерүгә Россия хөкүмәте 1 милли­он 74 мең сум субсидия дә биргән. Әбинең бала­лары-оныклары йортның мәйданын киңәйтү мак­сатыннан, үз акчаларын өстәп, олырак йорт сал­дырдылар. Аның мәйданы 100 квадрат метрдан аз­рак артып киткән.