Минзәлә муниципаль районы

2013 елның 4 октябре, җомга

“Париж күге астында” халыкара конкурс-фестивале дөньяның иң матур шәһәрләренең берсе – Франциянең Париж шәһәрендә узды.

Безнең фестивальгә баруыбыз Польша башкаласы Варшава шәһәреннән башланды. Польшада булу теләге һәркемдә дә бардыр, бу ил үзенең түбән бәяләре, истәлекле урыннары һәм бай тарихи мирасы белән туристларны җәлеп итә. Шәһәрнең үзәге икенче Бөтендөнья сугышы вакытында фашистлар тарафыннан бөтенләй җимерелә. Соңыннан тулысынча торгызыла һәм үрнәк фәнни реставрация мисалы булып, ЮНЕСКОның бөтендөнья һәйкәлләр исемлегенә кергән.

Польша безне пөхтә өйләре, каралган яшел газоннары һәм бик күп санлы табыну урыннары белән каршы алды. Поляклар бик дини кешеләр, шунлыктан кечкенә генә җирдә дә үзләренең чиркәүләре бар һәм анда бару өчен юл күрсәткече күрсәтелгән. Кунакханәләр Польшада югары дәрәҗәдә, бөтен кунакханә фонды яңарак кына төзелгән. Шулай итеп, ике йолдызлы кунакханә биш йолдызлы кебек күренә икән гаҗәпләнергә кирәкми, безне үзенең ап- ак сөлгеләре һәм туалет кирәк- яраклары белән таң калдырды.

Фестивальгә баруның киләсе тукталышы – Чехия, без Прага шәһәренә килеп җиттек. Монда русча сөйләшүчеләр бик күп,, ул безнең хәлебезне җиңеләйтте. Праганың иң күркәм һәйкәле дип, аның мәдәни-тарихи үзәген атарга кирәк. Праганың тарихи үзәге үзенең гадәти булмаган төрле эпохаларның архитектура стильләре: готик манаралары, мәдәни сарайлары, табыну урыннары, синагоглар, чиркәүләргә бәйле. Безне иң гаҗәпләндергәне, күп кенә готик корылмаларда кешеләр яши һәм әйтергә кирәк, начар яшәмиләр. Алар суүткәргечтән һәм компьютердан файдалана, телефон буенча азык-төлеккә заказ бирәләр, кичләрен яңа фильмнар карыйлар, цейтнот һәм дедлайн кануннары белән яшиләр. Европаның иң романтик урыны-Карлов күпере.

Париж белән танышу – Париж буенча автобус- җәяүле килеш күзәтү экскурсиясе белән башланды: Триумфаль арка, Елисей Кырлары, Ризалык мәйданы, Зур Бульвар, Изге Магдалена соборы, Гранд Опера, Вандом мәйданы, Тынычлык урамы, Риц кунакханәсе, Сите утравы, Нотр-Дам соборы, Юстиция сарае, Изге Часовня, Консьержери, Латин Кварталы, Пантеон, Сорбонна, Люксембург бакчасы, Инвалидлар сарае, Александр III күпере, Трокадеро мәйданы, шуннан соң юл иң затлы Эйфель манарасына ачыла.

Озак вакытлар буе ул Европаның иң эре шәһәрләренең берсе саналган. Парижда Сена елгасы аша 30 күпер салынган. Йолдыз мәйданы искиткеч матур күренә. Аңа 12 урам карый, ә нәкъ үзәгендә Триумфаль аркасы. Бу корылма үзенең күләме белән җәлеп итә: 45 метр киңлектә һәм 50 метр биеклектә, ә аның астында билгесез солдат кабере, анда мәңгелек ут яна. Парижны сурәтләп бирү мөмкин түгел – иң яхшысы аны күрү, аның үз стиле, үз исе, мөлаемлыгы.

Алда катлаулы фестиваль көне. Фестиваль кысаларында солистлар конкурсы, Европаның төрле илләреннән иҗат коллективлары, очрашулар, мастер-класслар, бүләкләү тантанасы һәм фестивальның гала-концерты узды.

Без уку елы буенча эшләнелгән “Кол Шәриф” мөселман киемнәре һәм “Диңгез тарихы” коллекцияләре белән “Мода театры”. номинациясендә катнаштык. Халыкара жюри безнең коллекцияне югары бәяләде, безгә икенче дәрәҗә диплом һәм истәлекле кубок тапшырдылар. Бу көннең матур нәтиҗәсе булып Диснейлэндка бару булды. Диснейлэнд – бу әкият! Диснейлэнд – балалар фантазиясенә чумарга, үзеңне яшь, хәтта бала-чага итеп тоярга мөмкинлек бирә. Паркта ун сәгать йөреп, бөтенесен дә карап бетерә алмадык һәм шулай ук кайбер атынгычларда гына булдык. Паркта бөтенесе дә инглизчә, ләкин бу безгә комачау итмәде, барын да аңладык.

Аннан Дрезденга күчтек. Дрезден – Саксониянең баш шәһәре һәм Германиянең иң матур шәһәрләренең берсе. Ул балыклы славян авылы урынында оешкан. Шау- шулы Прагадан соң Дрезден бик тыныч күренде. Дрезден тарихында трагик битләр аз булмаган, ләкин чын һәлакәт 1945 нче елның 13-14 нче февраленә каршы төндә булган, британлылар һәм америкалылар тарафыннан шәһәргә 3500 тонна янучы һәм фугас бомбалары ташланган. Иртәнгә легендар шәһәрдән көл генә калган. Бүгенгә кадәр торгызу эшләре дәвам итә. Сугыш вакытында иске шәһәрнең үзәге бигрәк зур зыян күргән, ләкин кайбер районнар беренчел күренешләрен саклап калганнар, болар үзләренә генә хас гаҗәеп архитектура белән эшләнгән саксон җирләренең читләре Эльба буйлап борынгы замоклар, шәһәр читендәге утарлар сузылган. Шәһәрдә иркенлек хөкем сөрә, сугыштан соң күп кенә кварталлар торгызылмаган, алар урынына парклар, бакчалар ясалган, транспорт магистральләре сузылган. Иске корылмалар яңалары белән күрше булып торалар. Кайчакта заманча урамнар буйлап барасың, өйләрнең ишек алдына карасаң, искиткеч, ХVII нче гасырга кайткан кебек буласың.

“Берничә бәхетле көн”, – фестивальдә катнашучылар үзләренең битләрендә, социаль челтәрләрдә шатлыкларын менә шулай уртак- лашканнар.

Бу халыкара конкурсларда талантлы балаларның беренче җиңүләре генә түгел. Дүрт ел рәттән икенче урта мәктәпнең “Мода театры” Халыкара милли киемнәр конкурсында катнашты, бу турыда ТР Мәдәният Министрлыгы, Казан дәүләт технология университеты, ЮНЕСКО мәдәният институты, Халыкара “Европа-Азия” гуманитар академиясе, РФ һәм ТР дизайнерлар союзы Дипломнары сөйли. 2013 нче яңартылган “Мода театры” “Адмирал йолдызы” иҗат проекты кысаларында балаларның, үсмерләрнең, яшьләрнең иҗат коллективлары “Виват, Казан!” Х Халыкара фестиваль-конкурсында I Дәрәҗә Диплом алды.

Оценить материал и/или оставить мнение

Светлана ПЕТРОВА,2 нче урта мәктәпнең технология укытучысы

БАРЛЫК ЯҢАЛЫКЛАРНЫ УКУ

Без дә Парижда булдык