8 миллион сумлык продукция
Бу ярминкәгә район хуҗалыклары, авыл җирлекләре, шәхси эшмәкәрләр, фермерлар килгән иде. Ярминкәгә алар сыер, дуңгыз, куян, кош-корт, сарык ите, катнаш азык, бодай, арпа, солы, борчак, бал, печән, суган, бәрәңге, кәбестә һәм башка продукцияләрен тәкъдим иттеләр. Район башлыгы Айдар Салахов продукцияләрнең бәяләре белән кызыксынып, сатып алучылар һәм ярминкәгә килгән сатучылар белән аралашканда, мондый яңгырлы, җилле көндә сатучылар өчен махсус палатка сатып алырга кирәклеген дә җиткерде.
Ярминкәдә тавык-үрдәк түшкәләре 500-600 сум, яңа суйган казныкы 1000-1100 сум тора иде. Әнә Иске Матвееевка җирлегеннән Рафак Габдрахманов шактый гына бал алып килгән, балның өч литрлы банкадагысын 1200 сумга саттылар. ”Куприянов” КФХда балны төрле формадагы савытларга тутырып алып чыккан. Бу ярминкәдә бал белән Аюдан Җәүдәт Борһанов, Чулпаннан Мирфаяз Бикташев, Минзәләдән Фәрит Кәримов һәм башкалар сәүдә иттеләр. Авыл җирлекләреннән килгән вәкилләр бик тырышканнар. Тауасты Байлардан килгән клуб һәм балалар бакчасы хезмәткәрләре 35 төрле продукция алып килгәннәр, алар арасында мәтрүшкәгә чаклы бар, кирәк кешегә чабата да алып килгән Маргарита Гәрәева. Аларның сатар продукцияләре бик күп, зәвык белән бизәгәннәр. Гомумән, авыл җирлекләреннән килгәннәрнең ассортиментлары бик бай иде. Николаевка җирлегеннән килгән Гөлназ Нуриева көзге байлыкны бик матур бизәгән. Юртаудан бертуган Ирек һәм Газинур Хамматовларның дуңгыз, сыер итләрен тиз арада алып бетерделәр. Рамил Муллахмәтов 4 процентлы майлылыктагы сөтне суытып алып килеп, 1 литр сөтне 24 сумга сатты. Шәхси эшмәкәр Геннадий Маслаков быел борай үстереп сата башлаган, ул аның килосын 50 сумга җибәрде. “Дәүләтов” КФХ бәрәңге, суган, чөгендер, кишер ише продукция белән сәүдә итте, ул кишерне юып алып килгән, суганын тиз арада алып бетерделәр. Аның суганын Әтрәкле җирлегеннән килгәннәр шактый алдылар, бу җирлектә быел суган уңмаган, бугай. Чулпаннан Резедә Якупова да 30 дистә йомыркасын тиз арада сатып бетерде. Ярминкәдә ит бик күп иде, аны 200-220 сумга саттылар, кайсыбер кеше хәтта ботлап алды. Балык участогы 14 төрле бер тонна балык алып чыккан, балыкның ниндие генә юк иде. Көз фасылының яңгырлы көнендә шәһәребез кешеләре, район халкы ярминкәдә кирәкле товар сатып алды, кышка запас туплады.