Минзәлә муниципаль районы

Авылның яңа сулышы

2013 елның 2 октябре, чәршәмбе

Ул ТР Президенты Р.Миңнехановның авыл клублары төзү программасы нигезендә булдырылган районда икенче мәдәният үзәге. Шушында ук ФАП, почта бүлеге, китапханә дә урнашкан. Мондый бинага ия булу Калморза һәм Яңа Александровка авыллары халкының күптәнге хыялы иде.

Калморза авылында клуб 100 урынга исәпләнгән. Калморзалылар өчен мондый зур җәмәгать үзәгенә ия булу күктән төшкән бәхет ул. Җәмәгать үзәге ачу тантанасына район башлыгы Айдар Салахов, ТР Президенты аппараратының территорияләр буенча эшләү идарәсенең баш советнигы Раил Гафаров, район Советы депутаты Эдуард Кузнецов һәм башка бик күп кунаклар килгән иделәр.

Җәмәгать үзәге ачу тантанасында Айдар Салахов чыгыш ясап болай диде:

– Авылда тормыш җанланып торсын өчен клуб, мәктәп, ФАП, китапханә, почта бүлеге булырга тиеш, тиздән сезнең авылда мәчет тә төзелеп бетәчәк. Бу җәмәгать үзәгендә сезнең авыл кешеләре өчен бөтен нәрсә дә бар. Клуб авыл халкына хезмәт итсен, төрле мәдәни чаралар үткәреп халыкның күңелен табарга гына кирәк. Тормышларыбыз елдан-ел яхшыра , җанлана бара.

Җәмәгать үзәген төзүче берничә төзүчегә район башлыгы Рәхмәт хаты тапшырды, ә клубка 10 мең сумлык сертификат бүләк итте. Раил Гафаров үз чыгышында бүген монда зур бәйрәм булуын, районның төрле программаларда катнашуын, республика буенча 46 клубның берсе шушы авылда төзелүен билгеләп үтте, бу клубта балалар өчен төрле түгәрәкләр эшләсен, клуб буш тормасын, авыл кешеләре монда килеп күңел ачсыннар, дигән теләген җиткерде.

“Лига” ҖЧҖ җитәкчесе Николай Степанов авыл халкына бәйрәм кәефе теләде, әлеге бинаны саклап тотарга кушты. Авыл халкы исеменнән хезмәт ветераны Гөлфә-ния Шакирова чыгыш ясап бу җәмәгать үзәген төзүчеләргә, җитәкчеләргә рәхмәтен җиткерде, 30 ел көткән клуб сәхнәсендә район үзешчәннәре, театр артистлары чыгышын күрергә теләүләрен, клуб балаларга, яшьләргә, картларга кирәклеген ассызыклап үтте.

Бу җәмәгать үзәге Калморза авылына нур биреп торачак

Дилфас ГАЛИЕВ

БАРЛЫК ЯҢАЛЫКЛАРНЫ УКУ