Минзәлә урамнарының берсен Каран Азик авылының Бөек Ватан сугышы каһарманы исеме белән атарга тәкъдим иттеләр.
Татарстан Республикасы Минзәлә районының Юшады авыл җирлегендә гражданнар җыены узды.
Юшады авыл җирлеге башлыгы Михаил Боков җыен вакытында Бөек Ватан сугышында һәлак булган Дан орденының тулы кавалеры - җирлек территориясендә урнашкан Каран Азик авылында туган Никита Фролов исемен мәңгеләштерү инициативасы белән чыкты.
- Әлеге тәкъдим кабул ителә, ул үтәлә алырлык тәкъдим. Өстәвенә без быел Бөек Җиңүнең 75 еллыгын билгеләп үтәргә җыенабыз. Минзәләдә берничә яңа урам төзелә, шуларның берсен сугыш каһарманы исеме белән атарга була, - дип җаваплады гражданнар җыенында Минзәлә районы башлыгы Айдар Сәлахов.
Район башлыгы якындагы ике елда Каран-Азикка илтүче юлның ремонтланачагын да белдерде.
Юшады җирлеге халкы клуб ремонты, Минзәлә-Сарман трассасына кадәр Кадрәк авылы аша Түбән Юшадыдан юл төзелеше буенча үтенечләрен белдерде. Авыл җирлеге бинасына капиталь ремонт уздыру зарурлыгы да искә алынды.
Михаил Боков хәбәр иткәнчә, республика программасы буенча 2020 елда Югары Юшады авылында модульле авыл кибете төзү планлаштырыла.
Юшады җирлеге тормышында актив катнашкан гражданнарга рәхсәт хатлары әзерләнгән: Елена Шкуркина, Луиза Токарева, Артем Арзамасов, Михаил Васильев, Юрий Юзманов.