Әлфия Когогина: Дәүләт Думасы кабул иткән закон проекты кече бизнеска салым басымын киметүгә китерәчәк.

Дәүләт Думасы салым салуның патент системасын куллануга рөхсәт бирелгән эшмәкәрлек эшчәнлеге төрләре исемлеген киңәйтү турында төзәтмәләрне соңгы, өченче укылышта кабул итте.

Дәүләт Думасы депутаты, Икътисадый сәясәт, сәнәгать, инновацияле үсеш һәм эшмәкәрлек буенча комитет рәисе урынбасары Әлфия Когогина новеллага комментарий бирде:

«Без асылы кече бизнеска салым басымын түбәнәйтүдә булган өстенлекле законны хупладык.

Патент системасы кулланылырга мөмкин булган эшчәнлек төрләренә үсемлекчелек һәм терлекчелекнең барлык төрләре, мәктәпкәчә һәм өстәм белем бирү, репетиторлык, фотография өлкәсендә барлык хезмәтләр төре, кейтеринг форматында чараларга хезмәт күрсәтү керә.

Патент системасы гадилеге һәм сыгылмалылыгы белән аерылып тора, предприятиеләргә бухгалтерия, документларның зур күләмен алып бару. салым декларацияләрен тапшыру таләп ителми.

Аерым алганда, аграрийларга сезонлы эшләр өчен патент бер айдан башлап гамәлдә булу срогын сайлау мөмкинлеге белән отышлы. Иң мөһим момент – иреклелек, киләсе салым чорына салым салу схемасын ирекле сайлау".