Балалар мәйданчыгы булырмы?

Соңгы берничә ел эчендә Садак бистәсе шактый
үсте. Бүген биредә гадәти булмаган яңа төзелешләрне, матур
чәчәк түтәлләрен, кибетләр күрергә мөмкин. Йортлар берсеннән-берсе матур. Әкрен генә шушы бистә буенча барганда
биредә икешәр-өчәр бала үстерүче яшь гаиләләрнең күп булуын аңлыйсың. Урамнарда бала коляскалары тартып
йөрүче әниләрне дә еш күрәсең. Кечкенә балалар өчен урамда иң мавыктыргыч урын – балалар мәйданчыгы. Без хатта язылганнарны күздә тотып бистә буенча үттек, әмма балалар өчен рәхәтләнеп уйнардай, аларны күзәтеп-карап торучы өлкәннәр өчен җайлы урын күрмәдек. Чөнки бүгенге көндә Садакта балалар өчен бер генә уен мәйданчыгы да, яшеллек зонасы да юк. Үз йортлары белән яшәүчеләрнең кайберләре аптыраганнан
үзләре атынгычлар ясап куялар. Бала белән прогулкада йөрергә урын юк – яшь әти-әниләр бу проблема белән көн саен очрашалар. Бер яктан, бистәдә яшәүчеләр хәл ителмәслек берни дә таләп итмиләр, гадәти балалар мәйданчыгы гына. Әлеге проблеманы өйрәнергә дип баргач, “Безнең ничек яшәвебездә сезнең ни эшегез бар?” дигән сыман безнең сораштырып йөргәнебезне өнәп бетермәүчеләр белән дә очрашырга туры килде.
Югыйсә, максатыбыз – бу кешеләрнең яшәү рәвешләрен күрсәтү түгел, ә проблеманы хәл итәргә булышу. Шуңа күрә безнең сайтта теге яки бу мәсьәләгә кагылышлы гозерләрен белдерүчеләр үзләренең координаталарын да калдырсалар, без алар белән турыдан-туры элемтәгә керер идек.
Садак бистәсендә балалар мәйданчыгы булачакмы?
Әлеге сорау белән без районның баш архитекторы Владимир Петровка мөрәҗәгать иттек. Ул түбәндәгечә җавап бирде: ”Генплан нигезендә шәһәрнең чикләре киңәйтелде. М.Җәлил белән М.Кичубаев урамнары арасындагы участокта
социаль-мәдәни-көнкүреш объектлары төзелеше өчен урын бүленгән. 2013 елда 140 урынга исәпләнгән балалар бакчасы төзелешенә проект ясалды.
Киләчәктә спорт үзәге белән мәктәп төзү планлаштырыла. Алдагы елларда социаль-мәдәни объектлар: балалар һәм спорт мәйданчыклары, кибетләр, ял итү өчен парк, велосипед юллары ясау күздә тотыла”.