Пенсионерлар спортта да сынатмыйлар
Менә без, пенсиядә булсак та, барлык чараларда да актив катнашырга тырышабыз. Шушы көннәрдә генә яшьләр үзәге әзерләгән спорт чарасында катнаштык. Катнашучылар да, тамашачылар да күп булыр дип әлеге чарага барлык пенсионерларны да чакырдык. “Юбилейный” спорт комплексында үткәрелгән бу чара спорт зарядкасыннан башланып китте. Лилия Яруллина әзерләгән күнекмәләр ярышларда катнашучыларның күңелләрен күтәреп, тәннәрен язып җибәрде. Спорт чараларында катнашучы өлкәннәргә медучилище укучылары көч-куәт биреп утырдылар.
Командалар барлык заданиеләрне дә уңышлы башкарып чыктылар: скакалкадан сикергән чакларын, туплы уйнаганнарын, яшь бала биләгәннәрен искә төшерделәр, берничә минутка артист булып та уйнап алдылар. Медучилищеның студентлары исә пенсиягә чыккач та күңелле итеп яшәргә мөмкин булуын үз күзләре белән күрделәр.
Әлеге чара “Бердәм Россия” Бөтенроссия сәяси партиясенең Минзәлә җирле бүлекчәсе канаты астында үткәрелде. Әлеге партиянең Минзәлә җирле бүлекчәсе башкарма комитеты җитәкчесе Елена Сысоева ярышларда катнашучыларның һәркайсына истәлекле бүләкләр тапшырды, барыбыз да җыелышып истәлеккә фотога да төштек (рәсемдә).