Укучыларның киләчәген кайгыртып

Чыгарылыш сыйныф укучыларын һөнәри белем бирү уку йортларына укырга керүгә әзерләү максатыннан 2003-2004 уку елында Хуҗәмәт урта мәктәбендә 9нчы сыйныф укучылары өчен профильле укыту кертелде.

2004-2007 уку елларының икенче этабында мәктәп ма­тематика фәне буенча про­фильле укытуны башлады. Соңыннан исә информацион- технологик профильле укытуга күчте һәм бүгенге көнгә кадәр әлеге юнәлештә белем бирә. Мәгълүмати-методик әзерлек бирү максатыннан мәктәп КамПи (хәзерге КФУ) белән хезмәттәшлек итә, әлеге югары уку йорты укытучылары укучы­ларга дәресләр уздыра.

Профиль юнәлештә укы­тыла торган фәннәр (мате­матика, информатика һәм ИКТ) – мәктәпнең реаль мөмкинлекләрен, укучыларның сәләтләрен, ата-аналарның теләкләрен исәпкә алып, юга­ры сыйныф укучылары сай­лаган профиль буенча юга­ры дәрәҗәдә укытыла торган фәннәр булып саналалар.

Профиль фәннәрне тиешле белемгә ия булган квали­фикацияле укытучылар укыта.

Шушы юнәлештә белем бирүче укытучылар Камил Гәрәев, Фәрит Вәлиуллин, Миләүшә Төхфәтуллина төрле курсларда үз белемнәрен күтәрәләр, һөнәри бе­лем бирү буенча уздырылган чараларда катнашалар, дәресләрдә заманча технологияләр кулланалар.

Шулай ук практик эшләр башкару, тикшеренү эшчәнлеге алып бару өчен “Программалаштыруга ке­реш” һәм “Инженер графикасы” электив курслары да кертелде. Бу курсларда укучылар компьютер ярдәмендә программалаштыру һәм модельләштерүнең асылына төшенәләр.

Укучыларны дәүләт йомгаклау аттестациясенә, бердәм дәүләт имтиханнарына әзерләү буенча да эшләр уңышлы алып барыла. Моның шулай икәнен укучыларның нәтиҗәләре раслый. Чыгарылыш сыйныф укучылар математика, информатика һәм ИКТ фәннәре буенча район һәм республика күләмендә югары балл җыйдылар. Район күләмендә узган олимпиадаларда да укучылар әлеге фәннәрдән призлы урыннарга ия булалар. Уңышлы эшләүнең тагын бер күрсәткече – мәктәпне тәмамлап чыккан укучыларның барысы да профильле юнәлештә белем бирүче югары уку йортла­рына (КФУ, КГЭУ, ИЭУИП һ.б.) укырга керәләр.