Матурлык турында кайгыртабызмы?
Татарстанда, шул исәптән районыбызда 25 апрельдән башлап Агач утырту көне акциясе старт алды.
Минзәлә урманчылыгы хезмәткәрләре шушы максаттан Минзәлә урман хуҗалыгы питомнигында үстерелгән яшь үсентеләр әзерләп куйганнар иде. Шул рәвешле тирә-юнебездәге экологиянең сафлыгы, матурлыгы турында кайгыртучанлык күрсәтүче һәрбер минзәләлегә әлеге акциягә кушылу мөмкинлеге тудырылган иде.
Шәһәребездәге “Шатлык” балалар бакчасы коллективы Агач утырту көне акциясенә ныклап әзерләнде, Минзәлә урманчылыгына агач һәм куакларга алдан ук заявка биргән иде. Шулай итеп балалар бакчасы тирәсенә юкә, өрәңге, миләш агачлары һәм спрей куак-лары утыртып куйдылар.
Надежда Калинина, “Шатлык” балалар бакчасы мөдире:
– Без “Шатлык” бакчасы яшеллеккә күмелсен өчен бар көчебезне куябыз. Узган ел көзен газон үләне чәчкән идек. Быел юкә, өрәңге, миләш кебек агачлар утырттык, хәзер 780 төп спрей утыртабыз, аннары сирень, зәйтүн, кизил утыртасыбыз бар. Гомумән, территориядә барлыгы 1800гә якын агач һәм куак тәрбияләп үстерәчәкбез.
Флүрә МУСИНА