70 яшьлек шофер
– Безнең алыштыргысыз кешебез, – диләр аның турында “Органик Групп- Чулман” ҖЧҖ идарәче компания җитәкчеләре.
Дөрестән дә, Өлфәт Фәрдиев, күп еллар шахтер, шофер булып эшләп, хезмәттәшләре арасында хөрмәт казанган өлкән хезмәткәр.
Өлфәт абый өч мәктәптә укый: Югары Байлар, Түбән Тәкермән, Күзкәй. Пермь крае Гремячинский шәһәренә шахтага эшләргә китә. Кичке якта шәһәрдәге ДОСААФта укып, шофер һөнәре үзләштерә. Армия сафларында Венгриядә ракета гаскәрләрендә хезмәт итеп кайтканнан соң, Воркута шәһәренә шахтага эшләргә китә. Эшләгәндә читтән торып шәһәрнең тау техникумында укый, мастер булып эшли башлый. Җир астында эшләгәндә үк шахтаның участок начальнигы Александр Савченко: “Өлфәт белән разведкага барсаң да була”, – дип һәрчак әйтә торган була. Шахтада 10 елдан артык хезмәт куйганнан соң, “ЛИАЗ” автобусында шахтерларны эшкә йөртә. 50 яше тулгач, Хуҗәмәт авылында бер иске генә өйне сатып алып, шуның янына яңа өй җиткерә. Шул ук вакытта Хуҗәмәт катнаш азык заводына “КамАЗ” автомашинасын
да шофер булып эшкә урнаша. Ул оешма таралу хәленә җиткәч, аны Минзәлә икмәк кабул итү предприятиесенә кушалар. Әлеге оешма да банкротлыкка чыккач, Өлфәт ага тик ятарга уйламый – “Куйбышев” хуҗалыгына эшкә урнаша.
Теләсә-нинди кырыс һава шартларында да, алсыз-ялсыз йокысыз төннәр үткәреп, хуҗа- лыкка кирәкле булган йөкләр ташучы Өлфәт Фәрдиевнең идарәче компаниягә керткән өле- ше бәяләп бетергесез.
– Бу фидакарь җан ял һәм бәйрәм көннәре белән дә хисаплашмый. Кушылганны җиренә җиткереп үти, сүз тыңлаучан. Олы яшьтә булса да, чырышлыгы, риясызлыгы белән идарәче компаниядә ихтирам-хөрмәт яулады. Еллык хезмәт нәтиҗәләре буенча мактап телгә алына, техникасын һәрчак төзек тота. Гомумән, ул күпләргә өлге булырлык, – ди филиал җитәкчесе Линар Ахунов.
Өлфәт аганың үгет- нәсихәткә, өйрәтүгә мохтаҗлыгы юк. Үзенә билгеләнгән эше, алдына куйган максаты, ыжгырып торган арбалы “КамАЗ”ы бар. Иңнәренә төшкән җаваплылыкны тоеп, яз җитү белән, чәчү эшләрендә катнаша, аннары сенаж-силос сала, урып-җыюда да сынатмый ул.
Хезмәттәшләре Габдулла Гәрәев, Мөнзил Гыйльметдинов, Зөфәр Минаев аны шаяртып “безнең шахтер” дип кенә эндәшәләр. Әйе, ул һәрвакыт эштә, автомобиле ватылса, эштән кайту белән бераз капкалап ала да, “КамАЗ”ын иртәнгә ремонтлап та куя.
Күп вакытта авырлык- ларга ихтыяр көчен каршы куеп барылса да, Өлфәт Фәрдиев бернәрсәдән дә зарланмый.
Тормыш иптәше Рәсимә ханым белән бер кыз һәм бер ул тәрбияләп үстергәннәр. Шушы араларда 70 яшен тутырса да, Өлфәт ага яшьләр кебек янып, булсын дип эшләп йөри.
Язма герое портретына штрих
– Бездә эшләгән кешегә һәрвакыт эш бар, һәм аның күләме дә куйган хезмәттән чыгып түләнә. Димәк, акча алу үзеннән тора.
Иң әһәмиятлесе – бездә кешенең кадере бар. Шуңа күрә эшне өзлексез алып барырга, идарәче компаниягә төрле йөкләр ташырга тырышабыз. Киләчәктә дә шулай тату эшләргә язсын иде, – ди ул, олы канәгатьлек белән.