Киләчәге матур булгач, бүгенге кыенлыклар онытылыр

Районыбызда дәүләт программалары буенча социаль әһәмияткә ия булган объектлар төзү, капремонтлау эшләре быел да дәвам итә. Алар арасында хәзерге гимназия бинасын балалар бакчасы урнаштыруга әзерләү, ә гимназияне күчерү өчен элеккеге һөнәр училищесы бинасын капиталь ремонтлау да бар.

Изыскательләр урамындагы, 3/15Б адресы буенча 140 урын­га исәпләнгән балалар бак­часы өчен бинаны капремонт­лау “Лига” ҖЧҖ төзүчеләренә йөкләнгән. Биредә төзүчеләр февраль ахырында ремонт эшләрен башлап җибәрделәр. Бүгенге көндә объектта 30 кеше эшли.

“Лига” ҖЧҖнең ПТО началь­нигы Владимир Петров безне төзелеш барышы белән та­ныштырды:

– Хәзер төзүчеләр түбә ябар­га әзерләнәләр. Каникуллар башланганчы төзүчеләр ка­рамагына ике катлы бинаның бер өлеше бирелгән иде. Эчке якта демонтаж һәм кабаттан планировкалау эшләре бара, стеналарны штукатуркалау, тигезләү башкарыла. Бу объект гадәти түгел, моңарчы укулар алып барылды, уку процес­сына комачаулык тудырмаска тырыштык, төзүчеләр аерым ишектән йөрде, ял көннәрендә көчәйтелгән режимда эшләдек. Югарыда саналган эшләргә параллель рәвештә эчке ин­женерлык челтәрен (җылылык, су, канализация системаларын) яңарту эшләренә керешергә кирәк. Бинаның тышын яңарту, тәрәзә-ишекләрен алыштыру, территориясен төзекләндерү кебек эшләр дә башкарылачак. Вәсил Гыйләҗетдинов, район башкарма комитеты җитәкчесенең инфраструкту­ра үсеше һәм инвестицияләр буенча урынбасары:

– Татарстан Хөкүмәте та­рафыннан берьюлы ике объ­ектка акча средстволары бүлеп бирелде, берсе гим­назияне күчерү өчен учили­ще бинасына капремонтка 49 млн сум, мәктәпкәчә яшьтәге балалар учреждениеләрен модернизацияләү программасы буенча балалар бакчасы өчен гимназия бинасын капремонтла­уга – 56 млн сумга якын, шуның шуның 15 млн сумы мебель өчен, калганы – төзелеш эшләренә. Әлеге объектларны август­та тапшыру планлаштырыла. Шуңа күрә мәгариф учрежде­ниесе җитәкчелегенә төзүчеләр эшләрен дәвам итәрлек итеп, шул ук вакытта балаларның уку­ларына зыян китермичә, тиешле шартлар тудырырга кирәк.

Бер көйгә генә эшләп тору­чы гимназия коллективы өчен күченү мәшәкатьләр тудырыр, билгеле. Әлеге бакча нәниләр өчен дә, алаларның ата-ана­лары өчен дә зур куаныч булыр дип уйлыйм. Шул ук вакытта минзәләлеләргә өстәмә эш урыннары да булдырыла дигән сүз.

Наил Габдуллин, район мәгариф бүлеге җитәкчесе:

– Гимназия бинасы кайчан­дыр балалар бакчасы өчен дип төзелә башлаган, про­екты да балалар бакчасыны­кы, кабинетларын үзгәртеп ясарга туры килгән. Хәзерге вакытта гимназия буларак та бинасы нормативларга туры килми: түшәмнәре тәбәнәк, тәрәзәләре тар, спортзал кечкенә булгач укыту програм­маларын үти алмыйбыз. Әйтик, волейбол, баскетбол уйнарга мөмкинлек юк. Балалар бакча­сы буларак та бүлмәләр феде­раль таләпләргә туры килми. Әйтик, вентиляция торбала­рыннан башлап баскычлары­на кадәр. Өстәвенә бинага капремонт вакыты да килеп җиткән: җылылык, су, канали­зация системаларын алышты­рырга кирәк. Шуны истә тотып, Хөкүмәтебезгә шундый тәкъдим белән чыктык та. Республика җитәкчелегенә рәхмәт: гимна­зия белән шушы балалар бак­часы бинасын капремонтлауга 100 млн сум тирәсе акча бүлеп бирелде. Бу безнең өчен бик тә мөһим, чөнки күпме социаль проблемалар хәл ителә: гимна­зия иркен бинага күчә, өстәмә балалар бакчасына да ия була­быз. Чөнки балалар бакчасына 1,5 яшьлектән башлап 300гә якын бала чиратта тора.

Бүгенге көн белән генә яшәп булмый, киләчәккә дә карарга кирәк. Ата-аналарга да шуны аңлатырга тырышабыз.

акцент

– Әйе, капремонт башлану гимназия коллективы өчен мәшәкатьләр тудыра. Төзүчеләр уку елы беткәнне көтәрләр иде, объектны тапшыру срогына өлгерә алмаячаклар. Ата-аналар белән сөйләшеп, шушы мәсьәләне чишәргә, аңлашырга кирәк. Төрле мөмкинлекләрне карап чыктык, имтиханнарга әзерләнү өчен консультацияләрне әллә 1 нче мәктәптә үткәрергәме дип тә уйлаштык, ләкин 3 нче мәктәпкә тукталдык. Каникуллардан соң балаларга 3 нче мәктәптә 1, 11 сыйныфларга беренче, калган сыйныфларга икенче сменада укырга туры киләчәк. Анда мөмкинлекләр бар: якты, җылы, кабинетлар җиһазланган, ашханә эшләп тора, диде район мәгариф бүлеге җитәкчесе Наил Габдуллин.

Гимназиядә 200 укучы укый, аларны 23 укытучы укыта, 12 техперсонал исәпләнә. 9 сыйныфны – 17, 11 сыйныфны 11 укучы тәмамлый.

безнең өстәмә

Балалар бакчасының гомуми мәйданы 2300 кв.м. Нәниләр 6 группага йөриячәк. Биредә бинаның түбәсе алыштыры­ла, группалар өчен бүлмәләргә кабаттан планировка ясала. Нәниләр өчен уңайлы йокы һәм уен бүлмәләрендә сану­зел, чишенү бүлмәләре, яңа җиһазлар белән ашханә, бе­ренче каттагы уен һәм санузел бүлмәләрендә җылытылган идәннәр, һәрбер группага янгын куркынычсызлыгы буенча керү юллары, территориядә уен мәйданчыклары, күләгәле навеслар, спорт һәм ПДД өчен махсус мәйданчык,– әлеге уңайлыкларның барысы да биредә тәрбияләнәсе балалар өчен булдырыла.