Ремонт – үсеш булачак дигән сүз

“Мензелинские зори” агрофирмасына караган Калморза хуҗалыгы кышлату чорына җитәрлек азык запасы белән керәчәк. Быел барлыгы 2200 тонна сенаж салынды, 650 тонна печән, 900 тоннадан артык салам җыелып ферма яннарына кайтарып өеп куелды. Шуңа да биредә терлек азыгы маллар алдыннан тәүлек әйләнәсе өзелми.

Бүгенге көндә хуҗалык фер­масында 700 баштан артык мөгезле эре терлек асрала. Шуларның 210ы савым сыер­лары. Җәйге чорда да маллар алдыннан салам өзелмәде. Ул басуда комбайннар артыннан ук төргәкләргә төрелеп, ферма яннарына кайтарылып өелеп куелды. Җитәрлек күләмдә се­наж салынган, хәзер тиздән силос салырга тотыначаклар. Һәр баш малга 4әр килограмм фураж бирелә, – ди хуҗалык җитәкчесе Илфак Гумеров. Азык рационы яхшы булгач, хуҗалыкта савым күрсәткече дә бер савым сыерына исәпләгәндә бүгенге көндә 12,4 килограмм сөт савып алы­на. Җәйге чорда хуҗалык ту­лай савымны өч тоннага кадәр җиткергән булган. Хуҗалык бер сыерга сөт җитештерү бу­енча районда иң алдынгылар рәтендә. Һәр сыердан хуҗалык ел азагына чаклы 4,5 мең ки­лограмм сөт савып алырга исәплиләр калморзалылар.

Шунысын билгеләп үтәргә кирәк: хуҗалык җитәкчелеге токымны яңарту һәм яхшыр­ту буенча күләмле эш алып бара. Кара-чуар токымлы та­наларны үзе үрчетә, ягъни акча түләп читтән сатып аласы түгел. Быел гына да төп көтүгә 30 баш тана кертелгән. Тана­ларны төп көтүгә даими кертү нәтиҗәсендә савым сыерлары алты елга бер тапкыр тулысын­ча яңарыш кичерә.

Әлбәттә, хуҗалык эшчән- легенең уңышы, тәү чиратта, эшчеләргә бәйле. Бу җәһәттән хуҗалыкта бер йөккә җигелеп эшләүче бердәм, тырыш кол­лектив тупланган. Сыер са­вучылар: Татьяна Куряшова, Людмила Шәмсиева, Гөлүсә Хөсәенова, Марина Федото­ва бер-берсе белән ярышып эшлиләр. Көтүчеләр Ахмет Сайдахметов, Виталий Федотов малларны Ык елгасы буенда көтәләр, ә монда терлекләргә үлән җитәрлек. Калморза фер­масын җитәкләүче Галина Кулькова һәм бозау караучы Дәнил Билалов та күңелләре белән авылга береккән. Мал­ларга шулай ук өстәмә туклан­дыру да оештырылган. Судан­ка үләне, люцерна үләнен дә чабып турап маллар алдына тараталар. Терлекләргә ар­падан пешерелгән барда да бирелә, шуның нәтиҗәсендә сөтнең майлылыгы 3,7 про­центтан кимеми, аксымы да 3,2-3,3 процент тәшкил итә. Бүгенге көндә 210 баш сыерның 140 нан артыгы гына савыла. Иң мөһиме – хуҗалыкта авыл халкының күңеле көр һәм ты­ныч. Хуҗалыкның терлекчелек тармагында гына бүген ике дистәгә якын кеше хезмәт куя. Һәркемгә хезмәт хакы вакы­тында һәм, нигездә акчалата түләнә. Мондый мөнәсәбәт яңадан-яңа башлангычларга, эшкә дәртләндерә.

безнең өстәмә

Бүгенге көндә сөт ташлаган сыерлар өчен ташландык корпусны ремонтлау тулы көченә бара, ремонт беткәч монда 100 баш буаз сыер тотылачак. Бу фермада бозаулату боксы, 2 үгезгә махсус урын, азык өстәле, тимердән эшләнгән утар булачак, җылы су үткәреләчәк.