Җиңү белән кайттылар

9-14 яшьлек 11 кешедән торган Минзәлә командасы Олимпия чемпионы Евгений Садовский һәм олимпия уенчысы Василий Иванов призларына булган Бөтенроссия йөзү ярышларында катнашты. Волгоградка бөтен Россиядән 40 команда һәм 500 дән артык көчле спортчы килгән иде.

Ярышка безнең йөзүчеләрне дүрт ай әзерләделәр. Балалар һәр көнне ару-талусыз үзләренең күнекмәләрен эшкәрттеләр һәм яхшы нәтиҗәләр күрсәттеләр. Беренче сигезлеккә керделәр: Эмиль Котдусов – 4 нче урын (аркада йөзү), Максим Комиссаров – 5 нче урын (аркада), Ирина Красильнико­ва – 4 нче урын (аркада йөзү), Азалия Бәдриева – 8 нче урын (аркада йөзү), Гөлназ Гәрәева – 6 нчы урын (аркада), Анна Новикова – 7 нче урын (брасс), Ләйлә Кашапова – 6 нчы урын (баттерф­ляй). Шулай ук унике көчлеләр арасына Евгений Комиссаров, Екатерина Гран­кина, Марсель Әкрамов керде. Әйтергә кирәк, беренче тапкыр Минзәлә тари­хында ярышта катнашучы Виктория Николаева беренче зур разряд үтәде, хәзер ул спорт мастеры кандидаты исе­мен яклау өчен әзерләнә.

Ярыш нәтиҗәләре буенча безнең ко­манда 4*50 катнаш эстафетада 3 нче урынны алды һәм Мактау кәгазе белән бүләкләнде. Бу ярышта безнең ко­манда яхшы оешканлык һәм активлык күрсәткән өчен Мактау кәгазе белән бүләкләнде.

Волгоградта үткәргән алты көндә, безнең команда вәкилләре шәһәр буйлап зкскурсиядә йөрделәр, Мамай Курганда булдылар, теплоход белән Идел елгасын­да сәяхәт иттеләр, пляжда кызындылар.

– Бу ярышларга без бик җитди әзерләндек. Балаларга көч биреп то­рырга аларның ата-аналары да барды. Безнең спортчылар ерактан ук күренеп тордылар, чөнки аларда Минзәлә гер­бы төшерелгән бертөрле спорт костюм­нары иде. Әйтергә кирәк, безнең яшь спортчылар чын мәгънәсендә көчле характер күрсәттеләр. Берөзлексез алты көн дәвамында көч сынашу җиңелләрдән түгел иде, бигрәк тә йөзү үзәкләре булган Петербург, Мәскәү, Пенза шәһәрләреннән йөзүчеләр кат­нашканда. Бу ярыш – алдагы җиңүләр өчен яхшы стимул булып тора. Авыр ва­кытларда балалары белән бергә булган ата-аналарга рәхмәт әйтәсе килә, алар балаларның буш вакытларын күңелле оештырдылар һәм ярдәм күрсәттеләр. Болар: Алсу Гәрәева, Елена Новикова, Светлана Новикова, Нина Комиссаро­ва, – дип фикерләре белән уртаклашты йөзү буенча тренер Наил Каюмов.

Илсөяр ХӘЕРТДИНОВА