Яхшы яшәр өчен

Халык җыеннарының төп максаты – авылларны үстерү, авыл эшчәннәре тормышын яхшырту буенча тәкъдимнәр туплау, диелде Юртау авыл җирлегендәге очрашуда.

Район башлыгы Айдар Сала­хов авыл хуҗалыгын үстерүгә һәм авылларны саклауга юнәлдерелгән программалар турында сөйләде. Бүлекчәдә бүгенге көндә һәр сыердан ур­тача 7-8 литр сөт савып алына, акча булсын өчен бер сыерга кимендә 14 литр сөт саварга, 700 грамм артым алуга ирешеп, ничек тә авыл хуҗалыгы про­дукциясе җитештерүне артты­руга ирешергә кирәк, дип авыл хуҗалыгы эшчәннәре алдында торган бурычларны телгә алды.

Республика программаларының Юртау авыл җирлегендә байтагы чагылыш тапкан: Лес­ная урамындагы күпфатирлы йортта капремонт үткәрелгән, гражданнарны авария хәлендәге йортлардан күчерү про­граммасы буенча 10 фатирлы йорт төзелеше башланган, аны Яңа елга өлгертергә тиешләр, диелде җыенда.

Соңгы елларда бистәдә шәхси йортлар төзүчеләр күбәеп, тулы бер урам – Яшьләр урамы хасил булган. Яңа йортларда яшәүчеләр шушы урамда юл, инженерлык коммуникацияләренә кагы­лышлы гозерләрен әйттеләр. Бистәдәге олы юл өстендә ур­нашкан кафе янында төннәрен шау-шу булуы, шуның аркасын­да шушы тирәдә яшәүчеләрнең тынычлыгы бозылуы турында әйтелде, нинди дә булса чара күрелмәсме, диелде очрашуда. Моның буенча участок упол­номоченные катнашында рейд үткәрергә, әлеге мәсьәләне контрольдә тотарга кушылды.

Өлкәннәргә дә кирәк игътибар, балаларга да

Урыс авыл җирлегендә үткән җыенда өч авылда да – Тулбай Гөлек һәм Урыста юлларның торышы турында сүз барды.

Гөлектә су мәсьәләсен кузгат­ты авыл кешеләре. Моның өчен проект хәстәрлеген күрергә кирәклеге әйтелде. Авыл җирлеге башлыгы бу мәсьәләне хәл итүдә нефтьчеләргә мөрәҗәгать итеп карамакчы. Урамнарны яктырту мәсьәләсе турында сөйләп, район башлы­гы Айдар Салахов болай диде:

– Быел районга 5 млн сум бүлеп бирелгән иде, әкренләп башланып китте әлеге эш, киләсе елга бу программага сезнең авыл да кертеләчәк.

Ветераннар советы рәисе Шәмсемөхәммәт Хаҗиев хуҗа- лыкның, авылларның бүгенге хәленә борчылуын белдерде:

– Хуҗалыкта моннан 10 еллар элек 45 трактор бар иде. Шул еллардан бирле авыл юллары да каралмый. Пенсиядәгеләргә ашлык, печән кирәкме диюче дә юк, – дип зарланды.

– Районда кайбер хуҗалык- лар халыкка яңа уңыш ашлыгы бирә башлады, бер пай җиренә түләү 500 сумнан да ким булма­ячак. Хәзер сакланып калганны сакларга кирәк. Шуңа күрә иң мөһиме – эш урыннары бул­дыру, авыл хуҗалыгын күтәрү. Тырыш эшчәннәр аз түгел хуҗалыкта, шуларны югалтма­ска кирәк, – диде район башлы­гы.

Тулбай авылында клубның кысанлыгы, балалар бакчасын­да урын җитмәве, китапханә, медпункт биналарының бик туз­ган булуы турында әйтелде.

– Авылларда күпфункцияле үзәкләр төзү буенча республи­ка программасы эшли, әйтик, Түбән Тәкермәндә, Иске Алек­сандровкада, Яңа Мәлкәндә шундый үзәкләр әлеге програм­ма буенча төзелде. Шунысы бар, мондый үзәкләр төзү өчен иң беренче таләп – авылда ха­лык саны 300дән дә ким булма­ска тиеш, – диелде бу уңайдан.

Форсаттан файдаланып, авыл кешеләре яңа эшли баш­лаган авыл җирлеге башлы­гы Фазыл Мәүлинның иници­ативасы белән Тулбайдагы китапханә коймасы коелу­ын, Гөлек авылындагы юлга комлы таш салдырылуын, юлны тигезләтүен әйтеп, рәхмәтләрен җиткерделәр, киләчәктә дә авылны яңарту буенча армый-талмый эшләвен теләделәр.

Үзәккә үткән юл

Тауасты Байлар авыл җирлегендә үткән очрашуда район башлыгы урынбасары Фәис Вагыйзов авыл хезмәтчәннәре алдында чыгыш ясап, аларны район тормышы, ил-көн яңалыклары белән таныштырды, республика программалары турында сөйләде.

– Бүген бердәмлекне са­клау мөһим, тынычлык бул­са, барысы да булыр, – диде ул бердәмлекне саклауның мөһимлегенә басым ясап.

Биредә үткәрелгән халык җыены башкалардан шуның белән аерылып торды: ул урам­да да түгел, клубта да түгел, ә ферма буенда үтте.

Авыл җирлеге башлы­гы Илшат Мәүҗиев мондый “шоу”ны болай дип аңлатты: район җитәкчелеге белән беррәттән, авылдагы бюджет хезмәткәрләренең дә ферма­да эшләүчеләрнең ничек итеп юлсызлыктан иза чигүләрен күрсеннәр өчен икән бу. Күрдек!!! Авылны бүлеп торучы тауның икенче ярында урнаш­кан фермага олы юлдан көч-хәл белән кердек. Ничә метр ара инде бу югыйсә. Шундый кыз­гандык җиңел автомобилебез­не, соңыннан андагы сазны бер сәгать буена юарга туры кил­де. Юллар мәсьәләсе бүгенге көндә ферма эшчәннәренең төп проблемасына әверелгән икән шул.

Авыл җирлеге башлыгы авыл тормышы белән таныш­тырып, “Байлар” бүлекчәсенең сөтчелек фермасы турында сөйләде. Биредә 108 баш са­вым сыерга бер савымчы, Эль­мира Макарова. Дөрес, аңа ире Константин да булыша.

– Хәзерге вакытта уртача көнлек савым 9 литр тәшкил итә. Бозауларны карау Мәсрүрә Шәрипова, Мария Тюрикова карамагында, – диде фер­ма мөдире Наилә Билалова. Янәшәдәге тагын бер торак­ка мөгезле эре терлекләр китерелергә тора. Юллар са­лынса, терлекчелектә эшләргә теләүчеләр артыр иде, диелде.

Дәвек авылындагы 1000 гек­тар җире булган, терлекчелек буенча да эшләүче фермер Язкәр Биҗановтан тыш, та­гын бер фермер пәйда булган җирлектә. Читтә яшәүче якташ­лары Фәнис Мәрданов баба­сы милкендә йорт салып ята, “Байлар” фермасы янәшәсендә сарыклар фермасы тергезеп җибәргән, тора-бара атлар да асрамакчы.

– Авылның киләчәге менә шундый тырыш, хезмәт сөючән кешеләр кулында, – диде авыл җирлеге башлыгы Ил­шат Мәүҗиев, эшләгән кешегә бөтен мөмкинлекләр булуы ту­рындагы фикерен куәтләп.

Флүрә МУСИНА