Балаларга таганнар ошый

“Балаларыгыз буш вакытларын кайда уздыралар?” дигән сорау белән без яшь ата-аналарга һәм балаларның әбиләренә мөрәҗәгать иттек.

Раушания Титова, әби:

– Оныгым София Титова (5 яшь) Нефтьчеләр паркына йөри. Ни өчен бу парккамы? Чөнки безнең юл уңаенда ул. Оныгымны 8 нче санлы ба­лалар бакчасыннан алгач, үзебезнең биш катлы 3/3 йор­тына барабыз. София монда таганнарда, карусельдә аты­нырга, тауда шуарга ярата. Бакчадан соң шунда керик, ди. Кайбер чагында парктан тиз генә өйгә керәсе дә килми, оза­клап утырабыз шунда. Әнисе белән Боз сарае янындагы уен мәйданчыгына да барганы бар, ләкин бу парк безгә юл өсте. Боз сарае мәйданчыгында җиһазлар яңа, ике тау, йөгерү юлы булса да, балалар күп булу сәбәпле, чират көтәргә кирәк. Изыскательләр урамында мәй- данчыклар үзәктәгегә караган­да күбрәк дигән претензиягә болай дип җавап бирергә була: күп фатирлы йортлар булганга монда бит халык та күбрәк яши, бер йортта 60 фатир – Минзәлә өчен бер урам дигән сүз бит бу. Изыскательләр урамы күпчелек шундый йортлардан тора да инде.

Юлия Галимәрданова, 28 яшь, яшь әни:

– Балаларым – Карина (5 яшь) һәм Яна (2 яшь) ял көннәрендә, җәйге җылы кичләрдә эш көннәрендә дә Нефтьчеләр паркында ял итәргә яраталар. Таганнарда атыналар, тауда шуалар, парк буйлап йөриләр. Тау биегрәк, шулай да. Мон­дагы зур ташлар да куркыныч тудыралар кебек. Алар монда күптән яталар инде, мөгаен, нәрсәгә дә булса файдалан­макчылардыр. Балалар алар өстендә йөрергә атлыгып тора­лар. Сүз уңаенда, узган ел бер бала анда аягын авырттыр­ды. Кайчандыр аю белән куян фигураларына зыян килгән иде, күптән түгел генә алар яңартылды. Балаларга бу фи­гуралар бик ошый. Алар янын­да фотога төшүчеләр дә бар. Бу паркта чиста, тирә-юньдә яшеллек. Без кайбер чагын­да 3 нче мәктәпнең яңа спорт мәйданында да ял итәбез.

Елена Мозаффарова, яшь әни:

– Аяз, җылы көннәрдә улым Адель белән (2 яшь тә 2 ай) без монда еш киләбез. Аңа монда барысы да: ком да, өйчек тә, җәнлекләр фигурасы да бик ошый. Тау белән карусельләрне бигрәк тә ярата төшә. Ни өчен нәкъ бу паркмы, чөнки монда балам яшендәге балалар ял итә, яшьтәшләре янәшәсендә аңа күңелле.

Айгөл Сәлимова:

Мин улларым Илнур (3 яшь) һәм Динар (9 яшь) белән Октябрьск урамыннан (безнең якын-тирәдә парклар, мәйданчыклар юк) машина белән Боз сарае янындагы һәм Нефтьчеләр паркларына киләбез. Боз сарае һәм теннис үзәге янындагы мәйданчыклар заманча җиһазланган, анда ми­нем олы улыма бик ошый. Ләкин ул тирәдә велосипедларда һәм роликларда яшүсмерләр зур тизлектә йөриләр, болгавыр анда. Нефтьчеләр паркында тыныч, балаларны күзәтергә дә уңайлы. Кечкенәбез Илнур таганда атынырга, тауда шуарга ярата.

Зөфәр Әшрәфетдинов, яшь әти:

– Кызларым Эвелина (3 яшь) һәм Аделина (8 яшь) буш вакытларда минем белән паркларда һәм балалар мәйданчыкларында йөрергә яраталар. Нефтьчеләр паркын­дагы таганнар безгә бик ошый, алар безнең балаларның яшенә туры килә. 3 нче урта мәктәптәге спорт шәһәрчегендә балалар яланаяк комда йөрергә, ар­канга менәргә яраталар. Зур кызым Аделина Боз сараен­да тимераякта фигуралы шуу белән шөгыльләнә. Әлеге балалар мәйданчыкларына без еш йөрибез. Кызларым (бигрәк тә кечкенә кызым) та­ганда атынырга бик яраталар. Нефтьчеләр паркында комлык өстенә (комлык дип мин бик зур булмаган ком өемен атыйм, балалар анда “күмәчләр” ясар­га, уенчык машиналарына ком тутырырга яраталар) түбә җитми, сабыйлар күләгә булмау сәбәпле, кызу кояш астында уй­ныйлар.

Марина Александрова, 28 яшь:

– Мин улым Арсений белән (аңа яшь ярым) теннис үзәге янындагы мәйданда көндезге бердән өчкә хәтле йөрибез, ул вакытта монда кеше аз була. Кичке 18-21 сәгатьләрдә Нефтьчеләр паркына барабыз. Монда кечкенә балам белән безгә уңайлырак, ә Боз сарае янында бу вакытта яшүсмерләр дә йөри башлый. Бу парктагы чисталык, тынычлык, яшел­лек бик ошый безгә. Арсений җанварлар фигурасы янын­да да, өйчек янында да бик теләп уйный, комда казына. Утырып балаларны күзәтергә эскәмияләр дә куелган.

сүз уңаенда

Шәһәр хакимияте каршындагы паркта (үзәктә) балалар өчен ясалган бер тау, ике таган бар. Ләкин ул игътибарны бик җәлеп итми. Яшь әниләр балалары белән монда кибеткә барганда яки кайтканда гына тукталалар. Ул тирәдә шәхси йортлар да аз, күбрәк дәүләт учреждениеләре урнашкан (зур­рак балалар “Юбилейный” спорт комплексына йөриләр). Ә менә Нефтьчеләр бистәсендәге иске стадионны, шул тирәдә яшәүчеләрнең фикере буенча, ял паркы итеп ясарга яки ба­лалар мәйданчыгы итеп җиһазландырырга була.