«Казан Экспо»да энергетика һәм энергия ресурслары нәтиҗәлелеге буенча Татарстан халыкара форумын ачу
Бүген ТР ИҮА җитәкчесе Талия Миңнуллина 3 көн дәвам итәчәк «Казан Экспо» да энергетика һәм энергия ресурслары нәтиҗәлелеге буенча Татарстан халыкара форумын ачу тантанасында булды. Аның төп темалары - импортны алмаштыру һәм энергетикада технологик суверенитет.
"Энергетика комплексы - Татарстанның инвестицион инфраструктурасының нигезе. Без торак пунктларны газлаштыру дәрәҗәсе буенча лидер регион, моннан тыш, республикада теләсә кайсы дәрәҗәдәге инвестиция проектларын гамәлгә ашыру өчен барлык шартлар да тудырылган. Сәнәгать объектлары өчен коммуникацияләрне тоташтыру мәсьәләләрен без инвесторларга ярдәм итү буенча эш кысаларында мөмкин кадәр тизрәк хәл итәргә тырышабыз» - Талия Миңнуллина.
Форум кысаларында «TatEnergyExpo» махсуслаштырылган күргәзмәсе эшли башлады. Экспозициядә Россиянең 17 регионнан, Беларусь Республикасыннан һәм Казахстаннан 80нән артык алдынгы тармак компаниясе тәкъдим ителгән. Шулай ук форумда катнашучылар өчен бай эшлекле программа әзерләнгән: берничә конференция һәм түгәрәк өстәл үткәрү планлаштырыла.
Рөстәм Миңнеханов билгеләп үткәнчә, 25 ел эчендә Казандагы форум үзен нәтиҗәле мәйданчык буларак танытты, анда Россия һәм кайбер чит илләрнең энергетика берләшмәсе энергетиканы үстерүнең һәм энергетика нәтиҗәлелеген арттыруның иң актуаль мәсьәләләре турында фикер алыша, заманча энергия нәтиҗәле технологияләр күрсәтә.
Ул ассызыклаганча, республика өчен энергетиканы үстерү һәм энергия нәтиҗәлелеген арттыру - өстенлекле бурычларның берсе.
Видеоэлемтә буенча күргәзмәдә Алабуга, Минзәлә, Питрәч һәм Лаеш районнарында ике автомобиль газ тутыру компрессор станциясен һәм ике криоген автозаправка станциясен ачу тантанасы узды.
Шулай итеп, бүгенге көндә республикада булдырылган АГНКС челтәренең гомуми проект җитештерүчәнлеге елына якынча 410 млн куб. табигый газ тәшкил итә - барлыгы 47 станция. Моннан тыш, Татарстанда елына 25 мең тонна куәте белән табигый газны сыекландыру буенча 2 комплекс файдалануга тапшырылган. 5 КриоАЗС эшли.