Солдат булырга әзерләнделәр
Җыенны ачу тантанасында район мәгариф бүлеге җитәкчесе Наил Габдуллин катнашты, ул ата-бабаларыбызның данлы традицияләрен дәвам итәргә өндәп чыгыш ясады. Дүрт көнгә сузылган җыенда егетләр тактик күнегүләр, гер күтәрү, турникта күтәрелү, 100 метрга йөгерү, автоматны вакытында сүтеп-кору буенча да нормативлар тапшырды. Нарядта тору һәм караул хезмәте кагыйдәләрен, хәвефсезлек чараларын кулланырга өйрәнделәр. Үсмерләр атарга өйрәнү полигонында винтовкадан атып, ату күнекмәләрен үзләштерделәр. Егетләр буш вакытларында шахмат- шашка, волейбол уйнап, футбол типтеләр. Хәрби кыр җыенында катнашучылар әфганчылар белән очраштылар.
Айнур Кәримов:
– Мин бу җыенны көтеп алдым. Мәктәптә укыганда хәрби белемне теоретик яктан үзләштерсәк, монда практик яктан үзләштердек, биредә алган күнекмәләр армия сафларына баргач, бик кирәк булачак. Мин армиягә зур әзерлек белән барырга тырышам.
Айдар Хасаншин:
– Бу җыенда миңа бик ошый, үзеңне хәрбиләр кебек тотарга өйрәнәсен. Караул тору тәртибе, стройда йөрү, стройда җырлау кебек биремнәрне үтәдек, физик әзерлек белән шөгыльләндек. Биредә яңа дуслар таптым. Армиягә бик теләп барачакмын.