Милләтләр дуслыгы бәйрәме
Илдус ШАҺИЕВ
Бу авылның тарихы тирәнгә китсә дә, аңа яңа сулышны биредә 1979 елда ачылган мөгезле эре терлек симертү комплексы бирде. Бирегә Татарстаннан гына түгел, Россия төбәкләреннән дә эшләргә киләләр. Соңрак читкә китүчеләр дә әйләнеп кайта. Хәзер биредә дистәдән артык милләт вәкилләре, 800 дән артык кеше дус булып аралашып яши. Бәйрәмнең ничек үтүе хакында menzela.ru сайтындагы фотогалереядан карагыз.
Милли ризыклардан сыгылып торган өстәлләр янында авылның өлкән кешеләрен сыйладылар, төрле номинацияләрдә бүләкләр өләштеләр. Совхозның беренче директоры Сиренат Хисмиев кайтып, чыгыш ясавы күпләргә күңелле сюрприз булды. Бәйрәмдә хор белән дә җырладылар, балалар да җырлап, биеп күңел ачты. Оригиналь номерлар да бүләксез калмады.
Коноваловка җирлеге башлыгы Сәрия Билалова авыл халкын бәйрәмгә чыгару җаен да тапкан, спонсорларның күп санлы булуы өстенә, бәйрәмне Мәдәният сарае янындагы мәйданда үткәрә башладылар. Юл өстендә һәм үзәктә булуы белән дә авылда яшәүчеләрне генә түгел, бәйрәмгә кайтучыларны да үзенә җәлеп итте ул.