Хушлашмыйча хушлаштылар

Соңгысы – “Бер яшәп калыйк әле” комедиясе премьерасы тамашачы­ны әсир итте. Спектакльне театрның баш режиссеры Дамир Сәмерханов сәхнәгә куйды. Рольләрдә нибары дүрт кеше – артистлар Рушания Га­лиуллина, Рания Җиһаншина, Рус­лан Әхмәтҗанов, Нәфис Гайфул­лин уйнаса да, тамашачы аны бик җылы кабул итте. Вакыйга узган гасырның 80 нче елларында бара. Җырлы-биюле комедиядә уйнап, тамашачының игътибарын җәлеп итү, алай гына да түгел, аларның мәхәббәтен казану яшь артистлар өчен кулай тәҗрибә.

Әсәрнең авторы – Башкортос- танның Нефтекамск шәһәрендә яшәп иҗат итүче Эсфир Ягудин (тамашачыга ул моннан дистә ел­лар элек сәхнә тоткан “Ашыгасың, Сафа!” әсәре белән таныш), спектакльгә музыканы язган Татарстанның атказанган сәнгать эшлеклесе Илгиз Закиров, РФнең һәм Калмыкиянең атказанган сәнгать эшлеклесе, художник Ва­лерий Яшкулов (барлык премьера спектакльләренең сценография­сен ул әзерләгән) тамаша залында утырдылар. Биюләрне Гөлфәния Шәймәрданова куйган. Театр директоры Роберт Шәймәрданов тәбрикләү сүзендә барлык тамашачыларны һәм килгән кунакларны сезон ябылу уңаеннан котлады, театрның алдагы сезонга планнары белән таныштырып үтте.

Һәрвакыттагыча залда энә төшәр урын да юк иде. Бу сезон­да кайсы спектакльләр сездә уңай тәэсир калдырды? Артистларны беләсезме, кемнәрне аеруча ярата­сыз? Спектакль башланыр алдын­нан тамашачы белән аралашып, шушы сорауларны бирдек.

Асия Фассахова:

– “Түтиләр” спектаклен бик ошаттым. Ел саен “Идел-йорт” фестиваленә алып килгән спектакльләрне яратып карыйбыз. Быелгысы бигрәк тә матур бул­ды. Артистларга килгәндә, Чулпан Бәдретдинованың уйнавын бик яратам, Илсинә Миңнемуллина бик ошый. Театрга быел гына килгән яшь егетләр шулкадәр ки­лештереп уйныйлар. Кеше белән дә шулкадәр оста аралашалар. Гомумән, Минзәлә артистларын яратабыз без.

Зәйтүнә ханым:

– Быел район Мәдәният йор­ты хезмәткәрләре “Идел-йорт” фестивалендә барыннан да яхшы чыгыш ясадылар, чын артистлар- дан ким түгел.

Аю авылыннан автобус белән ике дистәдән артык тамашачы килгән, өлкән яшьтәгеләр дә байтак арала­рында .

Рәфидә Фәйзуллина, Халисә Га­лиева:

– Бер генә спектакльне дә калдырганыбыз юк, дустым Халисә белән гел киләбез. Үзебезнекеләрне дә, читтән килгән артистларны да ошатабыз. Бу се­зонда Чаллы театры Зифа Кадыйрова әсәре буенча эшләнгән ”Яз­мыш сынавы” спектаклен күрсәтте, бик яратып карадык. Сезон ябыла, артистларыбызга иҗади уңышлар, уңышлы гастрольләр, тулы заллар, тамашачы мәхәббәтен яулауларын телибез.

Роза Мансуровна:

– Казаннан сеңлемә кунакка килдем, Минзәлә театры артист­лары чыгышын моңарчы бер дә күргәнем юк иде әле. Казандагы спектакльләргә сирәк йөрибез.

Зөһрә апа:

– Тамашаларга килгән саен, рәхәтләнеп карап, сөенеп кайтып китәбез. Рәзилә Муллина уйнага­нын яратам мин.

Резеда Фаррахова:

– Укучыларны театрның музе­ена алып килдем, бик ошаттылар, гомумән, алар театр белән бик кы­зыксыналар. Бер укучы белән “Гра­ни творчества” конкурсында катна­шып, урын алдык. Дәресләрдә театр турында күп сөйлим, укучыларга бик ошый.

Димәк, яшь тамашачы үсеп килә. Сыйныф җитәкчесенең бу гамәлләренә афәрин, диясе генә кала.

Сезон ябылды, әмма артистлар җәйге ялга киткәнче чыгышларын дәвам итәчәкләр. Театр директо­ры Роберт Шәймарданов әйткәнчә, “Без сезнең белән хушлашмыйча хушлашабыз”. ­