Профсоюз активлыкны арттыра
Дифиза НУРИЕВА
Бөтендөнья хезмәтне саклау көне уңаеннан «Татарстан Республикасы профсоюзлар федерациясе» союзы вәкилләре Минзәләдә профсоюз активлары, төрле оешмаларның кадрлар бүлеге һәм хезмәтне саклау буенча җаваплы хезмәткәрләре белән семинар-киңәшмә уздырып, эш урынында хезмәт кагыйдәләрен саклау буенча сөйләште, фильмнар күрсәтте.
Бүлек начальнигы – хезмәтне саклау буенча баш техник инспектор Ирина Андина сүзләренә караганда, узган ел Татарстанда эш урынында 251 хезмәткәрнең авыр тән җәрәхәтләре алуы һәм үлүе факты теркәлгән. Үлем белән тәмамланучы фаҗигаләрнең 37 проценты төзелеш тармагына туры килә. Транспорт белән бәйле булган һәлакатләр 32 процентны тәшкил итә. 2016 елда Минзәлә районында эш урынында травма алучылар һәм үлүчеләр юк.
Федерация вәкилләре профсоюз булган оешмаларда эш урыныда хезмәт кагыйдәләре яхшы саклануын һәм фаҗигаләрнең да азрак булуын ассызыклады, чөнки бу оешмаларда җәмәгать контроле көчле.
Семинарның икенче өлешендә Федерация күп еллар дәвамында профсоюзлар оешмасы координацион советының райондагы рәисе булып торган Розалия Зиннурованы «Татарстан Республикасы профсоюзлар хәрәкәте алдында башкарган хезмәтләре өчен» күкрәк билгесе белән бүләкләде, район башлыгы Айдар Салаховның рәхмәт хаты тапшырылды.
Безнең белешмә
Координацион советта исә профсоюзлар оешмасы координацион советының райондагы яңа рәисе сайланды. Әлеге җаваплы урынга Дәүләт учреждениеләре һәм җәмәгатьчелеккә хезмәт күрсәтү хезмәт- кәрләренең Минзәлә территориаль бүлегенең актив һәм тырыш рәисе Татьяна Докукина (рәсемдә сулдан беренче) билгеләнде. Дәүләт учреждениеләре профсоюзына кергән оешмаларда профсоюз әгъзалары, аларның балалары арасында төрле конкурслар еш уздырылу профсоюз тормышын тагын да җанландырып җибәрә. Әлеге профсоюзга кергән оешмалар арасында узган «Хезмәт кагыйдәләрен саклау – балалар күзлегеннән» дип аталган рәсемнәр конкурсына йомгак ясалды, семинар ахырында исә җиңүчеләргә һәм катнашучыларга дипломнар һәм кыйммәтле бүләкләр тапшырылды.