Аю гел беренчеме?
Авыл халкының эшмәкәрлек активын күтәрү буенча җирлек утырышын да алар беренче булып үткәрде. Бу җирлектәге актив яшәүче һәм эшләүче шәхесләр – крестьян-фермер хуҗалыклары, шәхси хуҗалыклар, эре инвесторлар турында язып торабыз. Шулай барсалар тагын язасы була. Чөнки яңа кешеләр эшмәкәрлеккә тартыла. Дружбада үз акчаларына теплица корып, суган кыягы, кыяр үстерүчеләр барлыкка килгән. Дыреевкада чаннарда балык үстерү юнәлеше һаман киңәя бара. Җирлек утырышында катнашкан район башлыгы урынбасары Камил Нәҗмиев, авыл хуҗалыгы һәм азык-төлек идарәсе белгече Лилия Хәсәнова залда утырган актив яшәргә омтылган авыл кешеләренең сорауларына җавап бирделәр, яңа программалар белән таныштырдылар.
Утырышның икенче көн тәртибендә авыл урамнарын, урман, су буйларына чүп түгүгә юл куймас чаралар планы да расланды.
Бу көнне Аю клубында һәм аның янында ярминкә гөрләде, Нәүрүз бәйрәме билгеләп үтелде.
Биредә чишмәләрне реконструкцияләү буенча зур планнар белән яшиләр. Бу өлкәдә дә аюлылар районда беренчеләрдән булырга җыена. Дөрес, чишмә төзекләндерүдә башлап йөрүче башка авыл җирлекләре дә бар. Әмма бүген авыл җанландыру өчен башлап йөрүчеләр, үрнәк күрсәтүчеләр күбрәк булсын иде