Торак алуга субсидия: ул кемнәргә бирелә

Районыбыздагы 15 күпбалалы гаилә торак шартларын яхшыртуга учетта тора, инва­лидлар һәм инвалид балалар – 38, сугышчан хәрәкәтләрдә катнашучылар – 39. Хәзер мон­дый субсидия 2003 елда учет­ка басучыларга бирелә. Торак шартларын яхшыртуга субси­дияне узган ел күпбалалы бер гаилә, сугышчан хәрәкәтләрдә катнашучы дүрт ветеран алды.

Торак шартларын яхшыртуга мохтаҗ гражданнар шәһәр башкарма комитетына гариза тапшыруга ук “Без торак алуга ничәнче булып чиратка куелдык?” дип сорыйлар. Торак шартларын яхшыртуга мохтаҗлар исемлеге ничек формалаша һәм аларга субсидия нинди тәртиптә бирелә соң? Гражданнарның күпсанлы мөрәҗәгатьләрен истә тотып, без шәһәр башкарма комитетының баш белгече Валентина Вышенская белән шулар хакында әңгәмә кордык.

– Иң беренче чиратта торак шартларын ях­шыртуга субсидия кайсы төр категория граж­даннарга бирелүен әйтеп үтсәгез иде.

– Мондый льготалардан Бөек Ватан сугышы ин­валидлары; Бөек Ватан сугышында катнашучылар, шул исәптән хәрәкәттәге армия составына кермәгән хәрби частьләрдә, учреждениеләрдә, хәрби уку йортларында 1941 елның 22 июненнән 1945 елның 3 сентябренә кадәрге чорда алты айдан күбрәк хәрби хезмәт үтүче хәрбиләр; “Блокададагы Ле­нинградта яшәүче” билгесе белән бүләкләнүчеләр; һәлак булган (вафат булган) Бөек Ватан сугышы инвалидларының һәм Бөек Ватан сугышында катнашучыларның гаилә әгъзалары, Бөек Ватан сугышында һәлак булганнарның гаилә әгъзалары файдалана. Шулай ук 5 һәм аннан да күбрәк бала­лары булган гаиләләр дә торак шартларын яхшыр­туга ташламалардан файдаланалар. Гражданнар торак шартларын яхшыртуга мохтаҗ буларак 2005 елның 1 гыйнварена кадәрге чорда учетка баскан булырга тиеш. Әмма сугышчан хәрәкәтләрдә катна­шучы ветераннарга бирелүче ташламалардан аер­малы буларак, әлеге ташламалар чикләнгән һәм ул мохтаҗларның кайчан учетка баскан булуына бәйле.

– Торак алуга субсидия күп балалы гаиләләргә нинди тәртиптә бирелә?

– Гражданнардан шәһәр башкарма комитетына кергән гаризалар ел буена туплап барыла, алар торак комиссиясендә тикшереп карала, анна­ры ел ахырында без аларны Казанга, ТР Хезмәт, мәшгульлек һәм социаль яклау министрлыгына тапшырабыз. Биредә аларны республика реестры­на кертәләр. Шулай итеп субсидия алучыларның берләштерелгән республика исемлеге төзелә, торак алуга субсидия шушы исемлек нигезендә төзелгән чират тәртибендә бирелә.

– Сугышчан хәрәкәтләрдә катнашучы вете­раннарга нинди ташламалар каралган?

– Сугышчан хәрәкәтләрдә катнашучы ветераннар (“Ветераннар турында”гы 1995 елның 12 гыйнварен­дагы 5 нче санлы Федераль законның 16 маддәсе нигезендә) ике төркемгә бүленгән: 2005 елның 1 гыйнварена кадәр учетка басучылар һәм 2005 елның 1 гыйнвареннан соң учетка басучылар. 2005 елның 1 гыйнварена кадәр учетка басканнар торак белән федераль бюджет средстволары хисабына тәэмин ителәләр. Аларга торак урынына торак төзелешенә яисә аны сатып алуга бер тапкыр бирелә тор­ган акчалата түләү алырга да була (гомуми торак мәйданының 18 кв.метры күләмендә һәм РФ субъ­екты буенча 1 кв.метрның уртача базар бәясеннән чыгып). Торак яки бер тапкыр бирелә торган акчала­та түләүне бирү тәртибе РФ субъектлары законча­лыгы нигезендә билгеләнә. 2005 елның 1 гыйнва­реннан соң учетка баскан сугышчан хәрәкәтләрдә катнашучы ветераннар торак белән РФ торак за­кончалыгы нигезендә, ягъни гомуми нигезләрдә тәэмин ителәләр. 2005 елның 1 гыйнвареннан соң учетка баскан сугышчан хәрәкәтләрдә катнашучы ветераннар торак белән РФдагы торак закончалы­клары нигезендә, ягъни гомуми нигезләрдә тәэмин ителәләр. Хәзерге вакытта шәһәребездә торак төзелеше ипотека кредиты программасы буенча алып барыла.

Флүрә МУСИНА