Эше данлы

Юрий Коршунов (рәсемдә) бар гомерен Степановка авылында үткәргән. Ул данлыклы Коршуновлар нәселеннән.

Юрийның әтисе Борис – шушы авылны саклап калучыларның берсе, улларын беркая да җибәрмәгән. Борис 80 нче еллар азагында Степа­новка авылында яшьләр өчен йортлар салдыруга ирешә. Аның уллары маллар да кара­ганнар, сыерын да сауганнар. Борис гаиләдәге балаларына яхшы хезмәт тәрбиясе биргән (урыны оҗмахта булсын). Юра кечкенәдән өй эшләрендә бу­лышкан, абзарларында һәм ишек алларында булган кош-кортны, терлекләрне карап үстерүгә ярдәм иткән. Юрий 12 яшьтән комбайнчы ярдәмчесе булып эшләгән. Иске Матве­евка авылында 10 сыйныфны тәмамлаганда аттестат белән бергә тракторчы-машинист та­ныклыгы да алып чыга. Мәктәптә укыганда ук авыл хуҗалыгы машиналарының серләренә төшенә. Хәрби хезмәткә алын­гач, хәрби өйрәнүләрне Куй­бышев шәһәрендә үтә, аннары Польшада танк гаскәрләрендә хезмәт итә. Армиядән соң ял да итеп тормыйча, Нива ком­байнына утырып эшли башлый, урак беткәч, МТЗ-80 тракторын иярли. Үз эшен һәрвакыт тел-теш тидермәслек итеп, сый­фатлы башкаруына инаналар җитәкчеләр. “Якты юл” совхозы бөлгенлеккә төшкәч, аны инвестор “Вамин” үз канаты астына алып эшли башлый, яңа техника­лар кайта. Шул яңа кайткан К-744 Р2 куәтле трак­торны җитәкчеләр кемгә бирергә дип аптырамый­лар – Юрийга тапшыралар. Ул шул тракторда язын, көзен җир эшкәртә, чәчүен дә чәчә. Көзге культура­лар өчен җирләрне әзерли. Авылда механизаторлар җитмәгәнлектән, ул Полесье-280 комбайны белән печән чаба, сенаж салуда эшли, көзен кукурузны урып силос салуда хезмәт куя. Быел ул хуҗалыкта 26 ел эшли. Алдагы еллардагы кебек көзге кыр эшләрендә дә сер бирми Юрий. Тикмәгә генә хуҗалыкта үз хезмәтенең чын остасы дип әйтмиләр аның турында. Ул кышын да тик ятмый, авыл хуҗалыгы машинала­рын ремонтлауда катнаша. Аны машина-трактор пар­кында бик оста көйләүче диләр.

Юрий Коршуновның гаиләсе дә үрнәк, тормыш иптәше Ольга Михайловна белән бер ул һәм ике кыз тәрбияләп үстерәләр. Авылда бу эш сөючән гаилә үзләренең 40 сутый бакчасында бәрәңге, төрле яшелчәләр һәм башкасын үстерә. Абзарында өч сыеры, өч танасы һәм ике бозавы бар. Булдыклы гаилә турында авылда бары тик мактау сүзләре генә ишеттем. Юрий белән Ольга авылыбызда күпләргә үрнәк гаилә, җир җимертеп эшлиләр, авыл халкын сокландырып яшиләр. Юрий Борисович авылда гына түгел, районыбызда да данлыклы механиза­тор булып танылды. 30 август көнне аңа тантаналы шартларда “Татарстан Республикасының атказанган механизаторы” дигән мактаулы исем бирелде. Моңа өстәп шуны әйтәсе килә, Юрийның хезмәт уңышлары дәвамлы, гаиләсе нык, сәламәт булсын, районыбыз­ны данга күмсен

Дилфас ГАЛИЕВ