Шәхси үрнәге – көчле тәрбия чарасы

Бүгенге көнгә кадәр Тауасты Байлар төп гомуми белем бирү мәктәбендә, канәгатьләнмәслек билге алып, аттестатсыз калган бер генә укучының да булмавы сөендерә. Ә бит зур уңышларның артында үз фәнен тирәнтен белгән, укучыларының язмышы өчен йокысыз төннәр үткәргән укытучының тырышлыгы, хезмәте, сабырлыгы яшеренгән.

Үзенең эшен яратып кына калмыйча, аңа бөтен барлыгын багышлаган фидакарь укытучыларның берсе – югары категория­ле математика укытучы­сы Венера Камил кызы Гыймадиева. 1992 нче елда Казандагы иң дан­лыклы университетның математика факультетын тәмамлаган шәһәр кызы үзенең язмышын авыл белән бәйләргә ният кыла. Билгеле, мондагы тормышка күнегү җиңел генә бирелми. Иҗади як­тан сәләтле, үз эшенә ихлас бирелгән укыту­чыны математика укыту­чысы итеп билгелиләр. 23 ел эшләү дәверендә балаларда үзе укыт­кан фәнгә мәхәббәт уя­тып, бәяләп бетергесез хезмәт куя, бай педагогик тәҗрибә туплый Венера. Һәр укучысының холкын аңлап, кирәк чакта гадәти булмаган эш алымна­рын да кулланып, белем- тәрбия бирә ул. Тырыш педагог дәресләрен, яңа технологияләр кулланып, күңел җылысы белән бик үзенчәлекле, мавык­тыргыч итеп үткәрә. БДИ дигән олы сынау да иң беренче аның җилкәсенә төшә. 2005 нче елда ма­тематикадан эксперимент рәвешендә кергән тәүге БДИ ны укучысы Ринат Хисамбиев “5” билгесенә тапшыра. Аннан соңгы еллардагы укучылары да сынатмый: БДИны югары балларга тапшырып, до­кумент алалар, һәр елны Бөтенроссия математика олимпиадасының район турында призлы урын­нар яулыйлар. 2013 нче елда 6 нчы сыйныф уку­чысы Нурфат Гыйльмиев, зона турында 2 нче урын яулап, башкалабызның иң дәрәҗәле уку йорты булган КФУ IT ЛИЦЕЙы­на укырга керү өчен сы­нау үтәргә чакыру ала. 3 этаптан торган конкурсны уңышлы үтеп, IT ЛИЦЕЙ укучысы булу бәхетенә ирешә. Ә бит 30-40 уку­чыдан торган авыл мәктәбеннән “җәүһәрләр” табу, аларны тиешле дәрәҗәгә күтәрү укытучы өчен бер дә җиңелләрдән түгел.

Саный китсәң, җаны- тәне белән хезмәт куй­ган мөгаллимнең каза­нышлары да, уңышлары да күп, мәктәп, район коллективы алдында да дәрәҗәсе югары. Инде 4 ел район күләмендә йом­шак укучыларны БДИ га әзерләү кебек гаять кат­лаулы һәм җаваплы эшне аңа тапшыру да очраклы түгел. Күрше авылларда­гы укучылар да репетитор буларак нәкъ менә аны сайлый.

Гадәттә укытучының үз балаларына вакыты калмый, диләр. Бу як­тан Венера Камил кызы – үрнәк әни дә дияр идем мин. Кызы Алсу – Казан дәүләт медици­на университетының 3 нче курсында бюджет бүлегендә белем ала. Улы Самат Тауасты Бай­лар мәктәбенең иң яхшы укучылары исәбендә. Бу­лачак милләтпәрвәр дә әле ул. Буа шәһәрендә үткәрелгән «Шәҗәрәләр – нәсел агачы» исемендәге I төбәкара фәнни-гамәли конференциядә катна­шып 1 нче урын яулады.

Укытучының шәхси үрнәге дә укучылар ара­сында көчле тәрбия чара­сы. Мин хезмәттәшемнең уңганлыгына, тырышлы­гына, җитезлегенә сок- ланам. Йорт янындагы бакчасында нинди генә чәчәк, җиләк-җимеш агачы үсми, бар җирдә тәртип, чисталык. Уңган хуҗабикәнең кулы сизе­леп тора. Кайчан килеп керсәң, ачык йөзле, кунак­чыл. Шуңа күрә туган-ту­мача, дус-ишләр өзелми бу йорттан.

Илсөяр ВӘҖИЕВА,  Тауасты Байлар төп гому­ми белем бирү мәктәбенең татар теле һәм әдәбияты укытучысы