Район башлыгы премияләр тапшырды
Комбайн штурвалы артында утырган механизаторларны эшкә дәртләндерү, рухландыру максатында һәм аларга тагын да югарырак уңышларга ирешүдә дәрт өстәү өчен Минзәлә районында төрле кызыксындыру чаралары кулланыла.
Районда хезмәт кешесен данлый беләләр. Районыбызда 300, 500, 700, 1000, 1200 тонна ашлык суктырган комбайнчыларыбызны бүләкләү башланды. “Органик Групп-Чулман” идарәче компаниянең ике комбайнчысы Илгиз Шияпов, Илдар Низамовка район башлыгы Айдар Салахов 5әр мең сум күләмендә премия һәм район башлыгының Рәхмәт хатларын тапшырды.
– Сез – чын хезмәт кешеләре, уракта геройлар, – диде район башлыгы, аларның кулларын кысып. – Шундый бердәм булып, көч туплап, ашлыкны вакытында җыеп алуыбызга ышанам.
Аннан соң “Органик Групп” идарәче компаниянең генераль директоры Илдар Гыймадиев йөкләмәләрен үтәгән биш комбайнчы: Алмаз Мөбәрәков, Әдһәм Аметов, Рәмзил Хәбиров, Илгизәр Сабиров, Рәшит Сабирҗановларга һәм ике шоферга: Мөнзил Гыйльметдинов, Ильяс Идрисовка 5 мең сум күләмендә сертификатлар тапшырды. Урактагы хезмәт алдынгыларын бүләкләү тантанасында Татарстан Республикасының авыл хуҗалыгы һәм азык-төлек министры урынбасарлары: Илдус Габдрахманов, Тәлгат Таһирҗанов та катнаштылар.