Бәхет ачкычлары

Безнең районда 30 президент программасы эшли. Шулардан берсе – гражданнарны авария хәлендәге йортлардан күчерү. Бу программа нигезендә безнең районда гражданнарны 34 авария хәлендә булган йортлардан күчерү планлаштырыла. Шушы көннәрдә район башлыгы Айдар Салахов тантаналы чарада катнашты – Гурьянов урамында урнашкан 46а, Мирный тыкрыгы, 5нче йортта һәм Садак бистәсендә яшәүчеләргә ачкычлар тапшырылды.

Анна Бескоровальная 2001 елда Молдавиядән безнең шәһәргә күчеп кайткан. 11 ел тузган йортта яшәгән.

– Без бу мизгелләрне бик күптән көттек, ниһаять, яңа фатир­га күчәчәкбез, – диде Анна Бескоровальная. Шундый авыр фи­нанс шартларында акча тапкан Татарстан җитәкчелегенә олы рәхмәтебезне белдерәбез «Монолит» ҖЧҖның баш инжене­ры Владимир Попов әйтүенчә, Гурья­нов урамында урнашкан 46а йортны ун ай эчендә төзедек. Төзү эшләре октябрь аенда башланды. Монда барлыгы 6 фатир, икесе – өч бүлмәле (70 кв.метр), икесе – ике (50кв.метр), тагын икесе – берәр бүлмәле (35кв. метр). Яңа йорт барлык энергоэф­фектлы таләпләргә туры килә, һәр фатир шәхси хезмәт күрсәтүдә, ба­рысында да исәпләгечләр һәм ае­рым җылылык узеллары урнашты­рылган. Шуңа күрә, урамдагы һава торышына карап, фатирдагы темпе­ратураны көйләргә була.

Тагын бер яңа күченүче – Миләүшә Галиева. Аның гаиләсенә сигез ел бернинди уңайлыклары булмаган шартларда яшәргә туры килгән.

– Иске өйдә газ, су юк иде, бөтен уңайлыклар тышта булды. Без бу программага эләгүебезгә бик шат, без фатирлы булдык. Хәзер безнең карамакта 35 квадрат метр, кер һәм яшә. Бу чынлап та бик истәлекле көн, шатлыгыбызны бөтен кеше белән уртаклашасыбыз килә, – диде Миләүшә. Йортның ишек алдында кечкенә генә балалар мәйданчыгы, бакча ясар өчен җире бар, анда яшелчә үстерергә мөмкин. Мир­ный тыкрыгындагы 5 нче йортны уникаль дип атарга була, монда яшәүчеләрдән көнләшерлек. Гому­ми мәйданы 80 квадрат булган 4 фатир да ике катлы. Беренче катта зал, ванна һәм бәдрәф бүлмәләре, икенче катта ике йокы бүлмәсе ур­нашкан. Монда Яңа Маҗын авылын­нан килгән гаиләләр яшәячәк.

– 13 ел су, җылылык булмаган йортта яшәдек. Балалар үсте, авылда эш юк. Безгә Минзәләгә күчәргә тәкъдим иттеләр. Мон­дый искиткеч фатир өчен, бик зур рәхмәт. Без күршеләр белән күчәбез, тагын бер-беребезгә ку­накка йөриячәкбез, – диде Ната­лья Фролова.

– Бу йортта яшәүчеләр шатла­нып яшәсеннәр иде. Фатирлар зур, уңайлы, бөтен җирдә җылы идәннәр җәелгән. Балалары бул­ган кешеләргә теләсә-кайсы ва­кытта җылылык кушарга мөмкин. Йорт ике катлы, шул ягы белән ул гадәти түгел. Алга таба да мондый йортлар салачакбыз, –диде под­рядчы Олег Ильин.

Йортның барлык яшәүчеләре исеменнән Марс Заһидуллин рәхмәт әйтте:

– Сүз дә юк, безгә барысы да ошый. Уңайлы һәм сыйфатлы то­ракка күчкәнебезгә без бик шат.

акцент

Әлеге программаның Дәүләт торак фондының гомуми инвестицияләре 150 млн 300 мең сум тәшкил итә. Төзелеш подрядчылары “Гарант плюс” ҖЧҖ (җитәкчесе Николай Секунов), “Төзүче” ҖЧҖ (җитәкчесе Марат Мавлютов), “Сфера Строй” ҖЧҖ (җитәкчесе Фаил Сабиров), “Сервис” ҖЧҖ (җитәкчесе Егор Юдин), “Монолит” ҖЧҖ (җитәкчесе Владимир Попов), “Минзәлә ПМК “Мелиорация” (җитәкчесе Олег Ильин), ШЭ Биҗанов, “СпектрСтрой” ҖЧҖ (җитәкчесе Алексей Ищеряков). 2013 елдан 2015 елга чаклы 132 гаилә яңа фатир алачак.