Николаевка күтәрелеше
Терлекчелектәге җиде айлык йомгакларга анализ ясау Николаевка товарлыклы-сөтчелек фермасында үтте.
Юкка түгел. Биредә ферма тирәсендә һәм корпуслар эчендә барган киң масштаблы үзгәрешләр белән беррәттән, үткән ел белән чагыштырганда күрсәткечләр дә уңай якка үзгәреп килә. Технологик үзенчәлекләр турында сөйләп укучыларыбызның башын катырмас өчен санап кына китәрбез.
Фермага һәм корпусларга килү юлына 1600 метр бетон юл салынды. 6 корпуска балчык салып агач идәннәр түшәләчәк. Рус Каран фермасында яңа су башнясы куела һәм яшь маллар өчен читлекләр куелып корпусларга реконструкция ясала.
Җиде айлык күрсәткечләр белән хуҗалык җитәкчеләрен, баш белгечләрне, җирлек башлыкларын, төзелеш оешмалары җитәкчеләрен районның авыл хуҗалыгы һәм азык-төлек идарәсе начальнигы Юрий Исламов таныштырды. Бу юлы анализны Николаевка фермасы хезмәткәрләре дә тыңлады. Ветеринария берләшмәсе начальнигы Ленар Хайбуллин яшь малларның сакланышы һәм торакларны дезинфекцияләү буенча үз фикерләрен әйтте. Район башлыгы Айдар Салахов алар әйткән һәр сан буенча хуҗалык җитәкчеләре өчен кыен сораулар бирде. Аеруча «Органик Групп» идарәче компаниясенә караган хуҗалык җитәкчеләренә күбрәк кызарырга туры килде. Минзәлә бүлекчәсендә 100 баш яшь малның үлүенә юл куелган. Чулманда – 90. Димәк, мал санын ишәйтү, сөтнең тулаем савымын арттыру буенча киләчәктә дә перспектива бик юк дигән сүз.
Айдар Салахов әйткәнчә, перспектива белән эшләү өчен яшь малларның саны сыерларныкыннан өч тапкыр артыграк булырга тиеш.
Район башлыгы, маллар лагерьлардан кайтканчы бозаулату бүлекләрен, корпусларын дезинфекцияләү һәм агарту, савым сыерлары торган корпусларда балчыклы такта идәннәр җәю, республика программасына кергән корпусларда ремонт төгәлләү бурычларын бөтен кискенлеге белән куйды.
– Т е х н о л о г и к процессның бу этабын ничек үтәвегез сезнең п р о ф е с с и о н а л ь л е к дәрәҗәсен күрсәтәчәк, – диде ул.
Бу эшләрнең күбесе сентябрьгә төгәлләнергә тиеш.
сүз уңаенда
Район авыл хуҗалыгы һәм азык-төлек идарәсе начальнигы Юрий Исламов җитәкчелегендәге идарә хезмәткәрләре, авыл хуҗалыгы өлкәсендәге бюджет предприятиеләрендә эшләүчеләрдән торган ярдәм бригадасы районның күп хуҗалыкларына булышты. Быел ярдәм Николаевка хуҗалыгына күрсәтелә. Хуҗалыкларда авыл җирлекләре башлыклары җитәкләгән бригадалар да эшли.
Илдус ШАҺИЕВ