“Дәртем дә, дәрманым да бар!”
Районда гына түгел, республика авылларында яше җитмешкә җитсә дә, сайлаган һөнәренә тугрылык саклаучы механизаторлар күп түгелдер. 70 яшьлек Әдһәм ага Аметов исә быел 30 нчы уракта катнаша.
Хуҗамәт авылында яшәүче Әдһәм абый Әлки районының Яңа Чаллы авылында дөньяга килә һәм шунда 7 сыйныфны тәмамлагач, тракторчы машинист һөнәрен үзләштерә. Үзенең хезмәт юлын Т-74 тракторында башлап җибәрә. Ул тормыш кыенлыклары алдында югалып калмый, һәр вакыйга га үзенең фикерен белдерә, яшьләрнең остазы, төпле киңәш бирүче, укытучы да, механизатор, инженер да.
Авылда 4 ел эшләгәннән соң, Казан дәүләт педагогия институтытының тарих, филология факультетына укырга керә. Армиядән кайтып институтны уңышлы тәмамлаганнан соң, юллама буенча Балык Бистәсе районының Югары Тәкермәнлек авылында урта мәктәптә тарих фәнен укыта, район партия комитетында инструктор, партоешма серкретаре, мәктәп директоры вазыйфаларын башкара. Шулай яхшы гына эшләп ятканда, министр фәрманы белән, аны Минзәлә шәһәрененең элеккеге Вахитов мәктәбенә директор итеп билгелиләр. Әлеге мәктәптә ел ярым эшләгәннән соң, Хуҗәмәт авылындагы урта мәктәпкә директор итеп тәгаенлиләр. 4 ел биредә хезмәт куйганнан соң, ачылган 52 нче СПТУның филиалына директор итеп күчерәләр. Ул СПТУның филиалында 2013 елга чаклы хезмәт куя.
Әдһәм ага җәйге чорда һәрвакыт комбайннарда эшли, алдынгы урыннарны ала. Булдыклы комбайнчыга төрле өр-яңа комбайннарны ышанып тапшыралар, Әдһәм ага “Колос”, “Нива” , “ДОН-1500”, ”Кейс” комбайннарын иярли. Уракта яхшы күрсәткечләргә ирешкәне өчен ул үз гомерендә 3 мотоцикл, ике суыткыч, келәм һәм акчалата премияләргә, район башлыгының Рәхмәт хатларына лаек була, Казан шәһәрендә үткән алдынгылар бәйрәменә дә алып баралар үзен.Әдһәм абый “Кейс” комбайны белән 2011 елда 42 мең центнер ашлык суктырган. Әдһәм абый быелгы уракта үзенә ярдәмче итеп Малтабар авылыннан Айзил Загировны ярдәмче итеп алган. Алар быел “Палессе” комбайны белән биш мең цетнердан артык ашлык суктырырга өлгергәннәр.
Өлкән Аметов «Минзәлә» газетасын 30 елдан артык алдыручы якын дустыбыз да булып чыкты.
– Төрле маркадагы комбайннарда эшләдем, комбайннарны карап, майлап, үз вакытында техник карау үткәрсәң, алар сиңа озак хезмәт итәләр, – ди Аметов. – 70 яшьтә булсам да, урак җитә башласа, күңел иген басуларына тартыла.
язма герое портретына штрихлар
– Ничек өйдә тыныч ятып була инде?! Гомер шул комбайн өстендә үтте бит. Аннары, сиксәнне куучы Әдһәм аганың комбайнда яшьләргә үрнәк күрсәтеп йөрүе – үзе бер мәртәбә дияр, идем. Шушындый өлкән абыйларының комбайнда йөрүе яшьләрне дә игенчелеккә ымсындырсын иде. Җирдә эшләргә кешеләр азаеп бара, шунысы күңелгә авыр. Ходай насыйп итсә, сәламәтлек булса, тагын берничә уракта катнашырга исәп бар әле! – ди Хуҗәмәт авылының абруйлы, мәртәбәле кешесе Әдһәм ага.
Әдһәм ага гаиләдә дә үрнәк ата, тормыш иптәше Зәнфирә ханым белән ике ул һәм бер кыз тәрбияләп үстергәннәр. Уллары Альмир һәм Айдар нефть өлкәсендә, кызлары Алинә балалар бакчасында тәрбияче булып эшлиләр, инде һәрберсенең үз гаиләсе бар.
Дилфас ГАЛИЕВ