Үсеш күз алдында

Татарстан лидеры Рөстәм Миңнеханов урак кампаниясенең барышын контрольдә тоту өчен соңгы ике атнада Республика районнарында игенчеләр белән очраша.

Быелгы урак Минзәлә райо­нында да оешкан төстә башла­нып китте. Урак темпы буенча без республикада лидерлар арасында. Димәк, соңгы еллар­да күтәрелеш кичергән терлек­челек өчен фураж да, сусыл азык та җитәрлек әзерләнәчәк дигән сүз. Ә үсешнең нигезе бу­лып районда уңышлы тормыш­ка ашырылучы республика пре­зиденты программалары тора.

Айдар Салахов, район баш­лыгы:

– Республика лидеры Рөстәм Миңнеханов инициативасы белән башланып киткән сыер абзарларын капиталь ремонт­лау, силос-сенаж траншея­ларын төзү программалары нигезендә былтыр 10 миллион сумнан артык ярдәм булды. 8 абзар ремонтланды, 3 тран­шея ясалды. Быел программа нигезендә 44 миллион сум­лык инвестиция кертелеп, 12 абзар ремонтлана һәм 2 си­лос-сенаж траншеясы һәм ике яшелчә саклагыч яңартыла. Киләсе елга аларның саны 15кә җитәчәк. Районда терлекчелек өлкәсендә технологияләрне камилләштерү буенча Респу­блика программаларыннан тыш үз программаларыбыз да тор­мышка ашырыла. Фермалар ре­монтлауга, агач идән түшәү һәм читлекләр ясауга, хуҗалыклар үзләре утыз миллион сум­нан артык инвестицияләр керттеләр. Республика прези­денты программасы нигезендә төзелгән ике ветеринария пункты, хуҗалыкларда гына түгел, шәхси йортларда бул­ган малларның сакланышын тәэмин итү буенча зур ярдәм булды. 60х40 программасы белән хуҗалыкларга дистәгә якын комбайн, куәтле трак­торлар, тагылма агрегатлар кайтты. Болар барысы ба­суларда барлык технологик операцияләрне вакытында һәм сыйфатлы итеп башкарырга мөмкинлек бирә. Николаевка фермаларына килү юлының 1600 метрын бетон белән җәю, инфраструктураны яхшырту белән беррәттән, хезмәт про­цессына да җиңеллек туды­рачак. Безнең өчен авылдагы белгечләргә арендага торак төзү зур ярдәм булып тора. 17 йорт ел ахырына куллануга тап­шырылырга тиеш. Без бу про­граммалар өчен республика җитәкчелегенә бик рәхмәтле.

Николай Яковлев, киң про­фильле механизатор:

– Мин Татарстанда үз бәхетемне таптым дип саныйм. Удмуртиядән җәй көннәрендә эшкә килгән җиремнән Югары Тәкермәндә төпләнеп калдым. Эш бар. Техника яңа. Безнең гаиләгә Республиканың Пре­зидент программасы нигезендә йорт салып бирәбез, дигән хәбәргә хатыным Лилия белән икәүләшеп шатландык. Хуҗалык җитәкчесе Илфак Мәүҗив сүзендә торды. Болай булгач, миңа берничек тә элен­ке-салынкы эшләргә ярамый.

Римма Санникова, савымчы:

– Соңгы ике елда сөтчелек тармагы моңарчы күрелмәгән үрләр яулый. Быел район күләмендә көнлек савымны 71 тоннага җиткерә алдык. Хәзер дә сөт узган елгыдан 4 тоннага якын артык сатыла. Үземнең һәм хезмәттәшләрем карамагындагы сыерларның про­дуктлылыгы арткач, хезмәт хакы да югары.

Радик Фәттахов, “Заиковский” хуҗалыгы җитәкчесе:

– Республика программаларының уңай тәэсирен без үзебездә берничә ел рәттән күрәбез һәм фай­даланабыз. Быел гына 60ка 40 программасы белән яңа “Полессе” комбайны алып кайттык. Хәзер җиде комбайн белән игеннәрне оптималь срокларда сук­тырып алу мөмкинлеге тагын да артты. Фермада 100 әр башка исәпләнгән ике корпусны капиталь ремонт­лыйбыз. Үзебездә генә түгел, тирә-күрше авылларда яшәүчеләргә республика җитәкчелеге башлаган буаз таналар сату программасында катнашачакбыз.

Игорь Землянов, терлекче:

–“Мензелинские зори”ның Калинин хуҗалыгында тер­лекчелек корпусларын ремонтлау һәм эшне механика­лаштыру – хезмәтне җиңел итеп башкару мөмкинлеге тудыру белән беррәттән, эшче кулларны рациональ файдалануга китерде. Элек төрле яшьтәге маллар­ны карау өчен 4 кеше эшләгән булса, хәзер 10 көннән алып 24 айлык малларны фәкать ике кеше карый. Бозауларның тәүлек үсеше 700 граммга арткан.

Илдус ШАҺИЕВ