Югары уңыш – яхшы оештыру ул
“Органик Групп-Чулман” идарәче компаниянең Тәкермән хуҗалыгы механизаторлары Минзәлә хуҗалыгында таралып бетә язган, рамы гына калган ике ДОН-1500 комбайнын алып кайтып җыйдылар.
Әлеге ике комбайнны да Илгиз Бикмухаметов үзе запас частьларны каян тапкан, шуннан җыеп чыкканнар. Хәзер бу ике комбайнда уракта яхшы гына эшләп киткән, барлыгы 1,5 мең цетнерга якын икмәк суктырырга өлгергәннәр.
Комбайнчылар: Илгиз Бикмухаметов, Андрей Грохов, Марат Абдуллин, Андрей Афанасьев Ринат Корбангалин, Рәхимҗан Шакирҗанов, Салават Салахов, Илһам Сөләйманов, Раушан Фахразиев, Фәрхад Шакирҗанов, Илгиз Шиябетдинов, Алексей Болгов бер-берсенә ярдәмләшеп эшлиләр. Алар суктырган икмәкне «КамАЗ» шоферлары: Гарифҗан Сабирҗанов, Габдулла Гәрәев берөзлексез ташып кына торалар, комбайннарның тик торуына юл куймыйлар. Гарифҗан машинасына өч бункер керсен өчен бортларын үстергән һәм өченче комбайн бушатканда күбрәк сыйсын һәм юлда кайтканда түгелеп, әрәм-шәрәм булмасын өчен көрәк белән тигезләп тора. Алты Дон-1500 комбайнын күргәч, М-7 трассасыннан үтүчеләр дә аларны күреп, сокланган һәм фото, видеога икешәр сәгать төшергәннәр. Хәзер күп җирләрдә ДОН комбайнары юк дәрәҗәсендә. Тәкермән хуҗалыгында бераз арыш сугуны төгәлләгәч, алар Куйбышев хуҗалыгының арышын суктырган, хәзер кабат Тәкермәнгә әйләнеп кайтканнар, арыш суктыруда эшлиләр, тиздән бу эш төгәлләнәчәк. Ындыр табагына кайткан икмәк шунда ук эшкәртелеп, кирәкле җиргә озатыла, орлыкка салына. Биредә Зөлфәт Хөснетдинов җитәкчелегендә кызу эш бара.Киләсе елга орлык запасы турында да уйлыйлар. Һава торышының да үзгәреп торуын исәпкә алып, уракның барышын яхшылап оештырырга тырышалар. Иң беренче чиратта, уңышның нигезе оештыруга бәйлелеген биредә онытмыйлар.
Басудагы игенне җыеп алгач, Риф Нуриахмәтов саламны төргәкләргә төрә, төрелгән саламны зур арбаларга Мәгъсүмҗан Сафин төйи, МТЗ-1221 тракторы белән Рамил Нәбиуллин, Михаил Кузнецов ферма яннарына ташыйлар. Саламнары җыеп алынганнан соң, Нәсим Сабиров МТЗ-1221 тракторында БДМ агрегаты белән җир эшкәртүдә хезмәт куя. Басуда эшләүчеләрне пешекчеләр – апалы-сеңелле Резеда һәм Зөлфия Сәйфиевалар сыйлый, алар ашларны төрләндереп пешерәләр, уракта катнашучыларга көн саен 350шәр грамм ит ашаталар.
Уңыш турында сүз чыгуга, хуҗалык җитәкчесе Илфак Мәүҗиев тук башаклы иген басуына күз йөртеп чыкты да:
– Аллаһы Тәгалә ярдәме белән булган быелгы уңыш әлегә өметләрне акларлык. Алда шул уңышны түкми- чәчми җыеп алу бурычы тора. Без моңа зур әзерлек белән килдек. Иң мөһиме – комбайнчылар үз эшләренә җаваплы карыйлар.
Дилфас ГАЛИЕВ