Матур традициягә әйләнеп бара
Элеккеге гимназия бинасын хәзер танып та булмый. Биредә төзекләндерелү эшләре гөрләп бара. Минзәләдә һәр елның сентябрендә яңа балалар бакчасы ачу матур традициягә әйләнеп бара!
2325 квадрат метр мәйданлы ике катлы бина 6 төркемгә исәпләнеп ясала. Урамда шулай ук 6 уен мәйданчыгы булдырыла, аерым мәйдан физкультура белән шөгыльләнү өчен корылачак.
Хәзерге вакытта икенче катта уен, йокы, бәдрәф, фойе бүлмәләре әзер. Шунысын билгеләп үтәсе килә, барлык бүлмәләр дә үзенчәлекле дизайн белән башкарылган, түшәмнәрендә рельефлы рәсемнәр. Музыкаль бүлмәдә 3Д техникасы белән эшләнгән ноталар. Җиһазлар шулай ук төс гаммасына туры китерелеп ясалган. Бакчада урнаштырылган өстәлләр, шкафларны шулай “Лига” оешмасы үзе ясый.
Беренче катта косметик ремонт эшләре ахырына якынлаша. Бинаның беренче катында җылытылган идән ясаганнар. Тулы куәт белән бинаны тышкы яктан ремонтлау эшләре бара. Стеналары башта җылытыла, яңадан металлосайдинг кагалар. Икенче катта урнашкан һәр бүлмәдән запас чыгу юлы булдырылган.
Бу 1 нче санлы “Нефтяник” балалар бакчасына хезмәткәрләр инде җыелган, хәзер алар бакчада җыештыру, территорияне яшелләндерү эшләре белән мәшгуль. 35 кешелек коллектив белән биредә Ирина Спиридонова идарә итәчәк.
Алисә ШАХАБУТДИНОВА