Кеше хезмәте белән матур

Садак бистәсендә ТОС-1, ТОС-2 (җитәкчеләре Гөлфия Хәлимова, Лариса Горячева) үткәргән микрорайон бәйрәмендә үрнәк гаиләләрне дә, тырыш хезмәтләре белән җәмәгатьчелекнең ихтирамын яулаган шәһәрдәшләребезне дә хөрмәтләделәр.

Бәхетле һәм пар ка­натлы, тигез гаиләләр – җәмгыятьнең нигезе ул. Бер-береңә карата ышаныч, хөрмәт, ихти­рам һәм ярату булганда гына гаилә бәхетле була. Пар канатлар булып 50 елдан артык бергә го­мер кичерүче шундый гаиләләрдән бәйрәмгә Га­лина һәм Борис Грошев­лар, Илсөяр һәм Марсель Багмановлар, Нурсилә һәм Миңнулла Минга­зетдиновлар, Софья һәм Виталий Арзамасовлар чакырылган иде.

Кеше гомерен юл­ларга тиңләргә була: кемнеңдер тормыш юлы озын, тигез, ә кемнекедер сикәлтәле. Микрорайонда яшәүчеләр арасында 33 сугыш һәм тыл ветераны яши. Әйе, аларның канат­ларына сугыш җилләре тигән: ир-атлар кулла­рына корал тотып немец фашистларын кыйнаса, хатын-кызлар җиңү өчен тылда хезмәт куйган, алар тыныч тормыш өчен ту­ган җирне саклаган, иген иккән, балалар үстергән. Бәйрәмгә чакырылу­чылар арасында Идрис Мөхәметдинов, Анна Кре­кова, Мәшһүдә Бадинова, Гөлсем Шакирова, Петр Чайкин, Наҗия Хәлимова, Алексей Бывальцев, Вера Казанцева, Николай Ма­каров кебек 90 яшь үрен узган ветераннар бар иде.

Бала-чагалы йорт – ул бәхетнең үзе, тор­мышыбызны шатлыкка күмә, яңа сулыш бөрки алар. Әмма агач кебек үзләре генә үсми, алар­ны тәрбияләргә, аңларга, яратырга, назларга да кирәк. Моның өчен ва­кыт та, зур көч кую да таләп ителә. Күпбалалы гаиләләрдән Светлана Урошникова, Наталья Гон­чарова, Елена һәм Алек­сандр Юминовлар, Фирая һәм Рамил Хәбировлар, Римма һәм Илнур Хәбировлар исемнәре яңгырады бәйрәмдә.

Игелекле эшләр, изге гамәлләр, акыл­лы киңәшләр белән без тирә-юньдәгеләрнең дә гомерләрен озынайтабыз, диеп бәйрәмне алып ба­ручылар Ксения Сысоева белән Гөлсәрия Хәбирова үз йортларын, урамнарын төзекләндерүгә игъти­барлы булган, инициа­тивалы кешеләр турын­да сөйләүләрен дәвам иттеләр. Әйе, безнең ара­бызда үз йорты турын­да гына түгел, ә күрше- күләннәр турында да кай­гыртучанлык күрсәткән, һәрдаим ярдәм кулы сузарга, киңәшләрен бирергә әзер торучылар бик күп. Шундыйлардан Виктор Сизов, Гөлсинә Закирова, Дилбәр Яку­пова, Гүзәл Ахметова кебек йортлар буенча җаваплы кешеләр үрнәк итеп куелды.

Матурлык дөньяны ямьгә күмә, диләр. Шәһәребезнең иң яшь микрорайоны булса да, Садак бистәсе төзек һәм матур йортлары белән күпләрне җәлеп итеп тора. Үз йортын, йорт яны тер­риториясен төзек, пөхтә тотучылар дип Котдус һәм Фәнҗия Мингазов­лар, Гөлнара Хәсәнова, Гәрәевлар, Секуновлар гаиләләре аталды.

Микрорайон тормышы­на битараф калмыйча, актив тормыш позици­ясе алып баручы ихты­яр көченә ия, максатка ирешүчән Николай Бата­ев, Сергей Холкин, Галина Ципцина, Валентина Бо­кова, Гөлназ Николаевага карата ихтирам хисләре белдерелде.

Бәйрәм башка микро­районнарда үткәрел- гәненнән шуның белән дә аерылып торды: биредә теләгән һәркем кайнап торган самовардан чәй агызып эчте, тәбикмәк белән сыйланды. ТОС җитәкчеләренең оста кулларны чакыруы да игътибарга лаек. Биредә Роза Гиздуллинаның, Н.Липинаның, С.Шайхра- зиеваның кул эшләре күргәзмәсе оештырыл­ган иде.

Бәйрәмдә бик күп при­злар өләшенде, анда катнашучылар күтәренке кәеф белән таралыш­кан икән, моңа Идарәче компания җитәкчесе Виталий Цветковның, АТП җитәкчесе Рамил Кәримовның, шулай ук Илгиз Саттаров, Нурия Нәбиуллина, Олег Ива­нов, Динара Чернышова кебек эшмәкәрләрнең спонсорлык ярдәме күрсәтүе дә этәргеч бирде, диде ТОС җитәкчеләре.

акцент

ТОС җитәкчеләре бәйрәм чарасын әзерләгәндә тынычлык һәм дуслык, татулык һәм тырышлык кебек төшенчәләрне үз иткән өлкән буын эстафетасының яшьләр кулына күчә баруын тасвирларга тырышкан. «Кеше хезмәте белән матур» дигән халык мәкале бәйрәм сценариеның асылы итеп алынган. Бәйрәмнең тирә- юньдәгеләргә ярдәм кулы сузып, бер-беребезне аңлашып яшик, бәйрәм чараларында шулай очрашып торыйк дип тәмамлануы да шуның бер чагылышы сыман.

безнең өстәмә

Бәйрәмдә катнашучы олысы-кечесе “Рэтро” театры җитәкчесе Ирина Моряхина һәм Галина Ципцина тарафыннан төзелгән сценарий буенча алып барылган әлеге чараны бик ошатты. Ул җырлар, биюләр белән үрелеп барды. Әлеге чарада район мәдәният бүлеге хезмәткәрләре дә катнашты, бу исә бәйрәм рухын тагын да көчәйтеп җибәрде. Данир Фәхретдиновның, Рифнур Кабировның чыгышларыннан тыш, ретро ансамбленең, Лилия Хәнипова, Евгений Вахнин, Айсылу Хәбирова, Зөлфия Мортазина, Динара Фәрдиеваның, “Уен” ансамбленең чыгышлары бәйрәмдә катнашучыларга бүләк булып иреште.