Штраф өчен түгел, балалар өчен борчылырга кирәк

Июнь аенда районыбызда “Игътибар, балалар!” республика профилактика чарасының беренче этабы үтте. Әлеге чара кысаларында “Бала – төп пассажир” ункөнлеге узды.

Гомумбелем бирү учреждениеләре, балалар бакчалары каршында инспекторлар күренү кайбер машина йөртүчеләр өчен сюрприз булды. Мәсәлән, бер әни, арткы утыргычтагы балаларының җайланмаларга утыртылмавы өчен штрафка тартылачагына бик нык кай­гырды. Автомобильдә өч бала, икесенә әле 12 яшь тулмаган, шуңа күрә аларны махсус утыр­гычсыз йөртергә ярамый. Закон бозган өчен автоледи һәрбер бала өчен 3000 сум күләмендә штраф түләргә тиеш.

Монда юл хәрәкәте кагый- дәләрен бозган балигъ бул­маган җәяүлеләр дә очрады. 9 яшьлек малай машина юлын­нан велосипедта бара, бу юл хәрәкәте кагыйдәләре буен­ча тыела. Ике укучы, тротуар була торып та, юлдан бара­лар. Мондый закон бозучылар аз түгел. Ункөнлектә ЮХИДИ хезмәткәрләре тарафыннан юл хәрәкәте кагыйдәләрен бозган 50 яшь закон бозучы кисәтелде.

– “Бала – төп пассажир” ункөнлегендә юл-патруль хезмәте постларында кечкенә пассажирларны махсус утыр­гычларсыз йөртүче һәм кур­кынычсызлык каешларын эләктермәүче закон бозучы­ларга аеруча игътибар итәбез. ЮХИДИ һәм трасса подраз­делениесе хезмәткәрләре та­рафыннан балаларны мах­сус җайланмаларсыз йөрткән 150дән артык машина йөртүче тоткарланды, – диде ЮХИДИ начальнигы вазыйфаларын башкаручы полиция майоры Рамил Әхмәтов.

Кагыйдәләр буенча яшәү – бик гади. Үзегезне һәм якын­нарыгызны саклагыз! Юл йөрү кагыйдәләрен үтәгез!

Алисә ШАХАБУТДИНОВА