Климовларда – өй туе

 Моңа кадәр авария хәлендәге йортта яшәгән Климовлар гаиләсе өчен шатлыклы көннәр – яңа йортка күченделәр.

Светлана һәм Марат Климовлар кызлары Арина, ул­лары Максим, сеңелләре (племяницалары) Валерия белән Муса Җәлил урамындагы күпфатирлы 65 нче йортта яшәгәннәр.

– Йортыбыз авария хәлендәге йортлар исемлегенә кертелеп, яңа фатирлы булу мөмкинлеге тугач, бик шат­ландык, тизрәк документлар тупларга керештек. Ае­рым йортлар төзелүе безне бигрәк тә кызыксындырды. Шуңа гаиләбез белән Сугышчы-Интернационалистлар урамындагы 3 нче йортны сайладык, – ди Светлана Ва­сильевна. Аннары ул элеккеге, авария хәлендәге торак шартлары турында болай дип искә алды:

– Йортыбыз шундый иске булу өстенә бернинди уңайлыклар да юк иде: суны урамдагы колонкадан ташыдык, мичкә утын ягышлы иде, бәдрәфкә урамга чыгып йөрдек. Газ кермәгәч, ашарга әзерләү бик чи­тен иде. Йортны сыйфатлы итеп төзегән подрядчы

 оешма –“Мелиорация” Минзәлә ПМКсы төзүчеләренә, безнең белән даими элемтәдә торып, документлар хәстәрләүдә булышкан белгечләргә рәхмәтебез зур.

Элеккеге фатирларының мәйданы 32,5 кв.м булса, яңа йортларының мәйданы 76,5 кв.м.

Светлана Климова яңа йортлары турында тәэсирләрен безнең белән дә уртаклашты:

– Балаларыбыз белән яңа йортның бусагасын атлап керүгә сөенечтән кычкырып җибәрдек. Йортыбыз ике бүлмәле, бүлмәләр якты, иркен, бигрәк тә кухня белән ваннасы. Бөтен уңайлыклар тудырылган. Ике контурлы газ казаны урнаштырылгач, кайнар суы да агып тора, суыклар башлангач, җылылыкны үзебез көйлибез дигән сүз. Балалар өчен дә уңайлы, иске торакта су җылытып җәфаланып бетә идем. Монда автомат кер юу машинасын урнаштырырбыз.

Урамнары яңа, шулай булса да юлга вак таш җәелгән, бу көннәрдә асфальт салырга әзерлек эшләре баруын күреп тагын да ныграк сөенгән алар. Яңа йорт өчен иске фатирның мәйданын чигергәннән соң 1 млн 200 мең сум тирәсе түлисе кала Климовларга. Анысын со­циаль ипотека программасында катнашып түләргә ка­рар кылганнар.

– Эшләп торганда калган сумманы ничек тә түләп барырбыз әле, – ди алар. Марат пластик тәрәзәләр ур­наштыручы шәхси эшмәкәрдә эшли, Светлана – “Маг­нит” кибетендә сатучы. Арина белән Максим 5 нче ба­лалар бакчасына йөри, озакламый аларны янәшәдәге “Шатлык” балалар бакчасына күчерәчәкләр.

 Светлана Климова:

– Йортыбыз янәшәсендә 8 сутый тирәсе җир участо­гы да бар, анда яшелчә, җиләк-җимеш үстерергә дип то­рабыз. Мунча, гараж салып куярбыз. Бу программаны булдырган һәм тормышка ашырган республика, шулай ук район җитәкчелегенә рәхмәтебезне җиткерәсе килә.

Флүрә МУСИНА