Эшчеләр янында кунакта

Укучылар арасында эшче һөнәрләргә кызыксыну уятуның иң үтемле чарасы булып аларны гади хезмәт кешесе эшләгән производствога алып бару, эш процессы белән таныштыру, күзәтү тора.

“2014-2020 елларга мәшгуль- лек үзәгенең эш программа­сы” һәм “2014-2020 елларга ТРда эшче һәм инженерлык һөнәрләрен популярлаштыру“ подпрограммалары кысала­рында һәм шулай ук “Хуҗәмәт РМЗсы яуланган казанышлар һәм яңа үрләр юлында” про­екты нигезендә шәһәребезнең гомумбелем бирү мәктәпләре, гимназиянең 7нче сыйныф уку­чылары өчен мәшгульлек үзәге әлеге заводка экскурсия оеш­тырды. Экскурсиянең максаты һәм бурычлары булып укучы­лар арасында инженерлык һәм эшче һөнәрләрне популярлаш­тыру, аларның абруен күтәрү, Хуҗәмәт РМЗсының тарихы, казанышлары, эшләп чыгарган продукциясе белән таныштыру, эшче һөнәр ияләренә карата хөрмәт һәм горурлык хисләре тәрбияләү тора.

Экскурсия программасы ча­раларга бай булды. Балалар иң элек завод эшләп чыгарган продукция күргәзмәсе белән таныштылар. Цехларда бөртек чистарту машиналарының ни рәвешле җыелуын, детальләр эшләнешен, эшчеләрнең нинди эшләр башкаруын күзәтү, алар белән әңгәмәләр кору балалар күңеленә хуш килде. Булачак машиналар өчен тимер чимал­ларны лазер станогында кисү, бораулау, тишү, эретеп ябыш­тыру, фрезерлау процессын күргәч, балаларның күзләре очкынланды. Күңелле момент­лар моның белән генә бетмәде: балалар завод ашханәсендә төшке аш ашадылар, үзәк һәм завод әзерләгән истәлекле бүләкләр дә алдылар.

Экскурсия балалар күңелендә онытылмаслык хисләр калдыр­гандыр һәм, бәлки, кемнәрдер киләчәктә үз тормышларын эшче һөнәрләре белән бәйләр дигән теләктә калабыз.

Руслан Хасанов, 1 нче мәктәп:

– Заводка экскурсия бик оша­ды. Бик уникаль завод. Ә бу­лачак һөнәремә килгәндә, әле сайламадым. Шулай да эшче һөнәрләр буенча азмы-күпме тәҗрибәм бар – әти белән эретеп ябыштыру эшләренә йөрим. Өйрәнгән һөнәрләрем киләчәктә кирәк булыр дип уй­лыйм.

Эмиль Маснабиев, 2 нче мәктәп:

– Экскурсия ярдәмендә рай­оныбызда шундый зур завод эшләвен белдек, монда тыры­шып эшләүче һөнәр ияләре белән таныштык, аларның эш процессын күзәттек, күптөрле станоклар күрдек. Әлеге сәяхәт киләчәктә безгә һөнәр сайла­ганда уйланырга җирлек булып торачак.

Эльвира Әхмәтова, 3 нче мәктәп:

– Заводтта ир-егетләрнең генә түгел, хатын-кызларның да эшләве, аларның двигательләр җыюы, үз хезмәтләрен яра­тып башкарулары һәм аннан канәгать булуы – әлеге нәфис затларга карата бездә хөрмәт хисе уятты.

Айдар Вагыйзов, гимназия:

– Әлеге предприятиедә эшләүче кешеләр гади хезмәтләр башкаралар кебек, ләкин һәр һөнәр билгеле бер белем һәм күнекмәләр таләп итә. Күргәнебезчә, завод яңа технологияле станоклар белән тулыланып тора, ә бу исә ком­пьютерны белү, физика, хи­мия кебек фәннәрне тырышып үзләштерүне таләп итә. Авыр металл эшләнмәләр белән эш итү өчен шулай ук физик көч тә кирәк.

Татьяна САМИГУЛЛИНА,  мәшгульлек үзәге директоры