Тагын бер программа
Районда таналарны максатчан үстерү программасы белән беррәттән, күпьеллык үләннәр чәчелгән мәйданнарны арттыруга да максатчан, ныклап торып керешелде.
Быел күпьеллык үләннәр чәчелгән мәйданнар күләме шактый артты. Люцерна, костер белән беррәттән, козлятник үләнен яңадан безнең басуларга кайтару башланды. “Чулман” агрофирмасының Ашпала авылы янындагы басуларга 60 гектар үлән чәчелде. Шул уңайдан үткән очрашуда район башлыгы Айдар Салахов быел печән әзерләү планы үтәлергә тиешлеген тагын бер кат ассызыклады. Кыска арада сыйфатлы азык әзерләү өчен көнгә бер пресслау агрегаты кимендә 100 рулон төрергә һәм район буенча көн саен ике мең тонна печән әзерләргә омтылырга кирәк дигән бурыч куйды. Су баса торган тугайларга да козлятник чәчеп калдырыр өчен орлык тупларга кирәк булачак.
Күпьеллык үләннәрне чабу, кипкәнен төргәкләү темпы көчәя бара. Әмма басудан ташып өеп куелган печән күләме әлегә 2500 тонна гына. План буенча ул 16137 тонна булырга тиеш. Аны нигездә беренче кат чабылган үлән белән үтәргә кирәк. Быел Бикбау, Яңа Маҗын болыннары да хуҗалыкларга бүлеп биреләчәк.
Гадәттәгечә, бюджет өлкәсендә эшләүчеләр беренчеләрдән булып яфрак азык әзерләүгә керештеләр. Шәһәр предприятиеләренә дә задание җиткерелде. Бәйләнгән яфрак азыкның күләме 35310 данә булырга тиеш. Әмма эшләүчеләр саны гына дөреслеккә туры килми, бугай.