Яшьлек, сәләт һәм үҗәтлек

1 июнь көнне Татарстан Президенты вазифаларын вакытлыча башкаручы Рөстәм Миңнеханов “Созвездие - Йолдызлык-2015” телевизион яшьләр фестивалендә җиңүчеләргә стипендияләр тапшырды. Рөстәм Миңнеханов сәләтле балаларга ярдәм итүгә зур игътибар бирә. Эстрада сәнгатенең “Созвездие – Йолдызлык” ачык телевизион яшьләр фестивале һәрвакыт Татарстан Президенты патронажы астында уза.

Без Бөек Ватан сугышын­да җиңүнең 70 еллык юби­леена багышланган быелгы фестивальдә “Вокал-соло” номинациясендә (2 нче кече төркем) 2 нче урынны яула­ган Софья Лебедева һәм аның остазы Наталья Муринова белән очрашып, әңгәмә кордык.

– Софья, вокал өлкәсендәге күп кенә уңышларың белән без хәбәрдар. Район газета­сын укучыларны да үзең белән таныштырып үтсәң иде. Вокал белән кайчан шөгыльләнә башладың? Музыканы яратуың кайчан­нан?

– Мин өч яшемнән җырлый башлаганмын. Шуннан бирле туктый алмыйм. Яшем җитүгә, музыка мәктәбендә укый башладым. Күп кенә район- шәһәрләрдә булып, призлы урыннар алдым, өч тапкыр Гран-при яуладым. Узган елгы фестивальнең суперфиналын­да 3 нче урынны алган идем, быел исә миңа бәхет тагын бер валы фестиваль, барысы да ба­лалар өчен эшләнгәне күренеп тора. Узган кышта мин шушы фестиваль юлламасы буенча Казан шәһәре янында ял иттем, быел исә мин Артекка чакыру алдым.

– Синең уңышларыңда остазың – педагог На­талья Александровна Муринованың хезмәте зур. Аның турында да сөйлә әле.

– Наталья Александров­на – искиткеч яхшы педагог. Аның энергиясе ташып тора, ул таләпчән дә, ягымлы да, гомумән, үз эшенең остасы. Мин аңа чиксез рәхмәтле һәм аны бик яратам. Без, аның кул астында шөгыльләнүчеләр, аны хөрмәт итәбез. Иҗатта гына түгел. ул тормышта да безгә таяныч булырлык. Аның зирәк киңәшләре алтынга тиң.

– Дөрестән дә, яшь җырчылар, биючеләр ал­дынгы урыннар алсын өчен остазлар зур көч куя. Һәр уңышлы чыгыш ар­тында озакка сузылган репетицияләр, эзләнүләр, борчылулар ята. Сәхнәгә чыгар алдыннан педагог белән укучының ничек дул­кынлануын алар үзләре генә белә. Наталья Алек­сандровна, сез үз укучыла­рыгызны әзерләүгә зур көч сарыф итәсез. Моның нин­ди хезмәт икәнлеген безгә дә бәян итегезче.

– XV “Созвездие-Йолдыз­лык” фестивале репертуары Бөек Җиңүнең 70 еллыгына багышланган иде. Фестиваль елдан-ел киң колач ала бара, үз орбитасына яңадан-яңа катна­шучыларны җыя. Шул исәптән, безнең район да инде өченче ел үз талантларын тәкъдим итә. Конкурсның сайлап алу “иләге” аша дистәләгән яшь башкаручылар уза. Зур сәхнәдә үз сәләтләрен күрсәтү һәм ачу өчен бу бик кулай мөмкинлек. Дөрестән дә, минзәләлеләрнең дә тәкъдим итәрлек номер­лары бихисап иде. Сүз дә юк, мин искиткеч шат, нәтиҗәләр шатландыра. Зона турын­да минем кул астында вокал белән шөгыльләнүче 6 кыз кат­нашты. Ирина Панарина һәм Гүзәл Мансурова мондый зур фестивальдә әле беренче тап­кыр гына катнашты, аларга бу тәҗрибә бик кирәк иде. Индира Газизуллинаны да күрделәр. Ул “Иҗади илһам өчен” мах­сус призына ия булды. Ә менә Фәизә Бәдриева һәм Софья Лебедева иң яхшы чыгыш яса­учылар җыелган суперфиналга чыктылар. Жюри әгъзаларына бик авырга туры килде, алар үзләре дә сәләтле балаларның елдан-ел артуын ассызыкла­ды. “Биредә җиңүчеләр дә, җиңелүчеләр дә юк. Спортта ярышалар, ә биредә исә талант өстенлек итә, ә аңа урын би­релми”, – диде жюри әгъзасы, ГИТИСның эстрада кафедра­сы актерлык курсының сәнгать җитәкчесе Михаил Борисов. Проект өстендә эшләгән ре­жиссерлар, рәссамнар һәм дизайнерлар, һичшиксез мак­тауга лаек. Катнашучыларның костюмнары турында бик озак сөйләргә булыр иде. Бразилия карнаваллары көнләшерлек костюмнар күреп, таң каласың: милли традицияләр сакланган, заманча рух та, үткәннәргә кай­ту да бар, ата-бабаларыбызның көнкүреш тормышы да чагылып китә. Алга таба да укучыларым белән алдынгы урыннар алыр­га омтылачакбыз.

– Софья, сәнгать юлында беренче адымнарын ясаган балаларга нинди сүзләр әйтер идең?

– Бар нәрсәгә өлгерү өчен ныклы сәламәтлек кирәк, үзегез сайлаган шөгыльне яра­ту мөһим, тырышлык, үҗәтлек, түземлек сезнең юлдашыгыз булырга тиеш. Шушы сыйфат­ларга ия булсагыз, хыялдагы уңышлар озак көттермәс.

– Зур рәхмәт сезгә. Киләчәктә иҗади проектлар­да тагын да зуррак үрләр яу­ларга насыйп булсын дигән теләктә калабыз.

Вакытлар узар, ә фестиваль дигән серле дөнья һәр бала күңелендә гүзәл бакча булып хәтердә калыр, ә ул бакча­да мәрхәмәтлелек, изге ният, Ватанга һәм кече туган илгә тугрылык хакимлек итә. Мон­дый мизгелләрне “уйнап” бул­мый, чөнки бала бәхетен уйнау мөмкин дә түгел. Ә “Йолдыз­лык” – бәхетле иҗади балачак бәйрәменең идеаль моделе.

2015 нче елда Фестивальгә 15 яшь тулды. Шәһәр күләмендәге яшьләр фестивале сыйфатында старт алган фестиваль бүген Россия масштабында мөһим мәдәни күренешкә әверелде. Татарстан лидеры Рөстәм Миңнеханов “Созвездие-Йолдызлык” фестивален Россиядәге иң уңышлы проектлар исәбенә кертә. Әлеге фестиваль сәхнә дип янып йөрүче балаларга иҗат Олимпына менү өчен үзенә бер төрле трамплин. Бу – сәләтлеләрне ачу өчен менә дигән мөмкинлек.