Мөһим көн
“Татарстан – музей язы” республика акциясе кысаларында туган якны өйрәнү музеенда тантаналы шартларда район мәктәпләрендә укучы, 14 яшь тулганнарга РФ гражданины паспортлары тапшырылды.
Тимерлан Нуриев (1 нче урта мәктәп):
– Мин Россия гражданины булдым, бу - минем өчен горурлык. Минем әнием һәм әбием эштә. Өйгә кайткач, беренче эш итеп аларга үземнең яңа паспортымны күрсәтәчәкмен. Шундый бәйрәм хөрмәтенә өйдә мине бәйрәмчә кичке аш көтәчәк.
Лилия Мөнирова (2 нче урта мәктәп):
– Бүгенге тантанага яхшы кәеф белән әзерләндек. Минем өчен үз илеңнең гражданы булу мактаулы. Олы тормышка юллама алып, без яшь кешеләр районның, илнең киләчәге өчен үзебезнең җаваплылыкны аңлыйбыз һәм РФ гражданы исемен лаеклы йөртәчәкбез.
Рамилә Галимова (2 нче урта мәктәп):
– Минем өчен бүген дулкынландыргыч көн. Үземне инде олы дип хис итәм. Паспорт алуны безнең һәрберебез олы мөстәкыйль тормыш башлана дип аңлый.
Ленар Фазылов (3 нче урта мәктәп)
– Мин бөтенләй дулкынланмыйм, миңа бүген ярдәм итәргә әнием һәм әбием килде. Паспорт безне гомер буе озата барачак. Минем өчен бу зур тормышка документ, балигъ булу юлында мөһим адым.