Республиканың яңа дәүләтчелегенә – 25 ел
Быел Татарстанның автоном дәүләт булып яши башлавына 95 ел тула. Шушы вакыт эчендә республикабыз һәрьяклап үсеп, үзгәреп бөтен дөньяга танылган ныклы Татарстанга әверелде.
1945 елның 24 февралендә чыккан “Ленин Байрагы” район газетасында да ТАССР төзелү темасы киң яктыртылган. Ике табак биттә Татарстан Автономияле Совет Социалистик Республикасы төзелүгә 25 ел тулу уңаеннан Татарстан АССР Югары Советы Президиумы, Татарстан АССР Халык Комиссарлары Советы һәм Бөтенсоюз Коммунистлар (большевиклар) Партиясе Өлкә Комитеты мөрәҗәгате басылган. Әлеге тарихи юллар сезгә дә кызыклы булыр дип уйлыйбыз:
“...Бөек Октябрь Социалистик Революциясе, патша властен бәреп төшереп, алпавытлар- капиталистлар изүен һәм милли изү богауларын җимерде, илебездәге барлык халыкларга азатлык китерде. Нәтиҗәдә татар халкы үзенең милли дәүләтен төзеде, формасы белән милли һәм эчтәлеге белән социалистик культурасын үстерде. Үзенең милли дәүләтен төзүдә, үзенең экономикасын һәм культурасын үстерүдә татар халкы һәрвакытта да бөек рус халкының ярдәменә таянды һәм таяна. Бу ике халыкның бозылмаслык дуслыкның гасырлар буена килгән җепләре һәм чит илләрдән килгән баскыннарга каршы, патшалыкка һәм алпавытлар-капиталистлар изүенә каршы гомуми көрәш берләштерде.
Якты көннәр килеп җитте, татар халык шагыйре Габдулла Тукай сүзләре белән чагылдырылган халык өметләре тормышка ашты. Тукай: “Иң бөек максат безнең хөр мәмләкәт – хөр Ру сия!” дигән иде...
Татарстан АССРның төзелүенә 25 ел гына булса да, бу вакыт эчендә Татарстан танымаслык булып үзгәрде. Фән, культура, сәнгать өлкәсендә зур уңышларга ирешелде. Республикабызның башкаласы Казан – вузлар шәһәренә әйләнде. Рус һәм татар телләрендә йөздән артык газета чыга. Татарстан тоташтан грамоталы республикага әверелде...”
Мөрәҗәгать һәр һөнәр иясенә аерым язылган. Мисал өчен, “Кадерле эшчеләр, эшче хатын- кызлар, колхозчылар, фән, культура һәм сәнгать работниклары” на мондый сүзләр юлланган: ”Советлар патриотының кайнар йөрәге тибә торган һәрбер кеше социалистик Ватаныбызның намусын, азатлыгын һәм бәйсезлеген кадерле санаган һәр граждан орденлы Татарстанның 25 еллыгы хөрмәтенә сөекле анабыз – Ватанга үзенең производство бүләген хәзерләсен.”
“Шәһәр хезмәт ияләре”нә исә мондый боерык бирелә: “Авылга ярдәмне көчәйтегез, районнарга, машина-трактор станцияләренә, к о л х о з - с о в х о з л а р г а шефлыкны ныгытыгыз, МТСларны тракторлар һәм комбайннар өчен запас частьлар белән тәэмин итегез. Татарстанның социалистик авыл хуҗалыгын күтәрүгә актив булышлык итегез”.
“ Я з у ч ы л а р , шагыйрьләр, художниклар, музыкантлар һәм артистлар” да мөрәҗәгатьсез калмаган: ”Республиканың юбилеена әдәбиятта һәм сәнгатьтә безнең бөек Ватаныбызны, аның батыр улларын һәм кызларын, СССР халыкларының туганнарча дуслыгын дан белән бизи торган яңа әсәрләр тудырыгыз”.