Булачак Боттичелли
Социаль челтәрләр – аралашу мөмкинлеге генә түгел, без журналистлар өчен талантлы, сәләтле кешеләрне табу алымы да. Фотографияләрен караганда, аңлыйм бала гади түгел.
Тимур Гатиятуллин Минзәләдә туган һәм үскән. Хәзер ул 1нче урта мәктәпнең 9нчы сыйныфында укый. “Кем булырга хыялланасың” дигән соравыма Тимур елмаеп җавап бирде:
– Минем хыялым рок- гитарачы булу, әгәр чын барлыкка якынрак килсәк, мин мөгаен, киләчәктә нефтьче булырмын.
Тимур гитарада уйнарга үзлегеннән өйрәнгән. Элек ул нотасыз уйнаса, хәзер ул ноталарны үзләштерә.
Тимур Гатиятуллин:
– Моңарчы миңа чит ил музыкасы ошый иде. Мин чит ил башкаручыларын карыйм, аларның миңа гитарада уйнаулары, аеруча бу инструментның яңгыравы ошый. Шулай итеп, миндә гитарада уйнарга өйрәнү теләге туды. Соңрак үзебезнең ил башкаручыларын, Виктор Цой кебекләрне тыңлый башладым. 15 яшемә әти-әнием гитара бүләк итәргә карар кылдылар.
Бер ел дигәндә Тимур гитарада уйнарга өйрәнә, хәзер үзе көйләр язып маташа. Аның тугрылыклы тыңлаучылары, әнисе һәм бик якын дуслары, иҗатының беренче җимешләрен ишеткәннәр инде.
Тимурга карагач, тагын бер тапкыр “Талантлы кешеләр – бөтен нәрсәдә талантлылар” икәненә инанасың. Тимур потретларны матур ясый икән. Ул инде эшләгән эшләренең исәбен дә белми. Ул күп эшләрен дусларына һәм якыннарына бүләк итә.
Тимур Гатиятуллин:
– Мин сәнгать мәктәбенә йөргәндә, без анда күбрәк натюрмортлар, композицияләр ясый идек. Ә миңа күбрәк кешеләрнең йөзләрен ясау ошый төшә. Аларның бит һәрберсендә бик күп мәгънә, эмоция ята. Һәрбер йөз – яңа ачыш, ә минем өчен – яңа иҗат эше.
Тимур шахматны да начар уйнамый, баскетбол белән дә шөгыльләнә, аңа еш кына сәхнәдә булырга да туры килә. Актив, талантлы, иң мөһиме мөстәкыйль балалар безнең районда да бар. Һәрбер бала педагог ярдәменнән башка өйрәнә алмый. Бәлки Тимур әле билгеле бер һөнәр сайлап, үз юлын билгеләмәгәндер дә. Әмма шунысы мәгълүм, күп нәрсәләрне танып белүче тынгысыз егетләр бер урында утырмый.
– Мин барыгызга да үз хыялыгызга омтылуыгызны телим, куйган максатларыгызга ирешергә язсын.