Хезмәттәшләрен онытмыйлар
“Татавтодор”ААҖнең Минзәлә филиалы җитәкчелеге тыл ветераннары Мөхтәр Мирфаязовның, Миргазиян Фәтхелбаяновның, Гөлсем Солтанованың өйләрендә Бөек Җиңүнең 70 еллыгы уңаеннан “Татавтодор” ААҖ әзерләгән бүләкләрне һәм конверт белән акча тапшырдылар.
Әлеге ветераннар филиалның Минзәлә участогында эшләп лаеклы ялга чыкканнар. Мөхтәр Мирфаязов 1978-1999 елларда автокран машинисты, Миргазиян Фәтхелбаянов 1968-2002 елларда тракторчы, балта остасы, Гөлсем Солтанова 1973-1976 елларда бухгалтер булып эшләгән.
Филиал җитәкчесе Марат Сәмигуллин ветераннарга бүләкләр тапшырганда аларның хәл-әхвәлләрен сораштырды, гозерләрегез юкмы дип кызыксынды, өлкәннәргә сәламәтлек-иминлек теләде.
– Күк йөзе аяз булсын, сугышлар кабатланмасын, хәзерге буынга без күргән авырлыкларны күрергә язмасын, – дигән теләкләрен әйтеп, үзләренең тормыш хәлләре турында сөйли-сөйли, тыл ветераннары “Татавтодор” ААҖ җитәкчелегенә рәхмәтләрен җиткерделәр.
безнең өстәмә
“Татавтодор” ААҖ Җиңү бәйрәме уңаеннан үзләренең сугыш һәм тыл ветераннарына һәр елны бүләкләр һәм шуңа өстәп конверт белән акча бирә. Минзәлә филиалында барлыгы 7 сугыш һәм тыл ветераны бар, шуларның өчесе – минзәләле.
– Коллективыбызда намуслы һәм тырыш хезмәт куйган өлкәннәребезне, ветераннарны онытмыйбыз, тормыш хәлләре белән кызыксынып торабыз. Өлкәннәр көне уңаеннан да коллективта эшләп чыккан өлкәннәргә (филиалга караган Минзәлә, Актаныш, Мөслим участоклары буенча алар барлыгы 89 кеше, шуларның 41е – Минзәлә участогыннан) мул итеп бүләкләр, инвалидлар көне уңаеннан 25 инвалидка (дүртесе минзәләле) конверт белән акча тапшыру традициягә әверелде, – диде ветераннар тормышы турында филиалның кадрлар буенча инспекторы Светлана Гордеева.